ചെറുതുരുത്തി: ചെറുതുരുത്തി പ്രാഥമികാരോഗ്യ കേന്ദ്രത്തില്‍ ജീവിത ശൈലീരോഗങ്ങള്‍ക്കുള്ള മരുന്ന് ലഭിക്കാതെ രോഗികള്‍ ദുരിതത്തില്‍. മരുന്ന് വിതരണം നിലച്ചിട്ട് മാസം നാല് പിന്നിട്ടിട്ടും ഒരു നടപടിയും കൈകൊള്ളാത്ത ആരോഗ്യ വകുപ്പ് അധികൃതര്‍ക്കെതിരേ പ്രതിഷേധം കനക്കുകയാണ്.
സാധാരണയായി വ്യാഴാഴ്ച ദിവസങ്ങളിലാണ് പി.എച്ച്.സിയില്‍ ജീവിതശൈലി രോഗ ക്ലിനിക്ക് പ്രവര്‍ത്തിക്കുക. ഫെബ്രുവരി പകുതിയോടെയാണ് മരുന്ന് വിതരണം നിലച്ചത്. പ്രമേഹ രോഗികള്‍ക്കുള്ള ഇന്‍സുലിന്‍ പുറത്ത് നിന്ന് വാങ്ങുമ്പോള്‍ 175 രൂപയോളം നല്‍കണം.
അതുകൊണ്ടു തന്നെ നിര്‍ധന രോഗികള്‍ക്ക് ഒരു മാസം ആയിരം രൂപയോളം ചിലവഴിക്കേണ്ടി വരുകയാണ്.
ജീവിത ശൈലീരോഗങ്ങള്‍ക്കുള്ള മുഴുവന്‍ ചികിത്സയും, മരുന്നും സൗജന്യമായി ലഭിക്കുമെന്നാണ് സര്‍ക്കാര്‍ പ്രഖ്യാപനം മരുന്നിനുള്ള പണം ട്രഷറിയില്‍ അടച്ചിട്ടുണ്ടെന്നാണ് വള്ളത്തോള്‍നഗര്‍ പഞ്ചായത്ത് ഭരണ സമിതി പറയുന്നത്.
എന്നാല്‍ എന്തുകൊണ്ട് മരുന്ന് ലഭിക്കുന്നില്ലെന്ന ചോദ്യത്തിന് മറുപടി നല്‍കാന്‍ പഞ്ചായത്ത് അധികൃതര്‍ക്കും കഴിയുന്നില്ല. ഈ അനാസ്ഥക്കെതിരേ പ്രക്ഷോഭത്തിന് തയ്യാറെടുക്കുകയാണ് ജനങ്ങള്‍.