മലപ്പുറം: അമിത്ഷാ കേരളത്തിലെത്തുന്ന 15ന് യൂത്ത്‌ലീഗ് നടത്താന്‍ തീരുമാനിച്ച ബ്ലാക്ക്‌വാള്‍ മാറ്റിവച്ചു. സംഘര്‍ഷ സാധ്യത ഒഴിവാക്കാന്‍ അന്നത്തെ സമരം മറ്റൊരു ദിവസത്തേക്ക് മാറ്റിവയ്ക്കാന്‍ ഇന്നലെ ചേര്‍ന്ന മുസ്‌ലിംലീഗ് ഉന്നതാധികാര സമിതി നിര്‍ദേശിച്ചു. അമിത്ഷായുടെ സന്ദര്‍ശനദിവസം കരിപ്പൂര്‍ വിമാനത്താവളം മുതല്‍ കോഴിക്കോട് വെസ്റ്റ്ഹില്‍ ഹെലിപ്പാഡ് വരേ കറുത്ത വസ്ത്രം ധരിച്ച് ഒരുലക്ഷം പേരെ അണിനിരത്തി കറുത്ത മതില്‍ തീര്‍ക്കാനാണ് തീരുമാനിച്ചിരുന്നത്. എന്നാല്‍ സംഘര്‍ഷം മാത്രമാണ് ബി.ജെ.പിയുടെ ലക്ഷ്യമെന്നും, അതിനാല്‍ അമിത്ഷാ പാര്‍ട്ടി പരിപാടിക്കെത്തുന്ന പതിനഞ്ചിനു കറുത്ത മതില്‍ സമരം ഒഴിവാക്കാന്‍ തീരുമാനിക്കുകയായിരുന്നു. ഇതു സംബന്ധിച്ചു യൂത്ത്‌ലീഗ് ഭാരവാഹികളുമായി ചര്‍ച്ച ചെയ്താണ് സമരം മാറ്റിയത്. ഇന്നലെ വൈകിട്ട് മലപ്പുറത്ത് ചേര്‍ന്ന ഉന്നതാധികാര സമിതി യോഗശേഷം പി.കെ കുഞ്ഞാലിക്കുട്ടിയും കെ.പി.എ മജീദും ഇക്കാര്യം വിശദീകരിച്ചു.