മൊഗാദിഷു: സൊമാലിയയിലെ എത്യോപ്യന്‍ സൈനികതാവളത്തില്‍ അല്‍ശബാബ് നടത്തിയ കാര്‍ ബോംബ് സ്‌ഫോടനത്തില്‍ നാല്‍പ്പതിലേറെ സൈനികര്‍ കൊല്ലപ്പെട്ടു. എത്യോപ്യന്‍ സൈനികതാവളത്തിലാണ് ആക്രമണം നടന്നത്.
 സൈനികതാവളത്തില്‍നിന്നു വലിയ പൊട്ടിത്തെറി ശബ്ദം കേട്ടതായും തുടര്‍ന്നു വെടിവയ്പ് നടന്നതായും സമീപവാസികളെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്തു. ഏറ്റുമുട്ടല്‍ ഒരു മണിക്കൂറിലേറെ നീണ്ടതായും റിപ്പോര്‍ട്ടുണ്ട്. അല്‍ഖാഇദ തീവ്രവാദികള്‍ക്കെതിരേ നീക്കം നടത്തുന്നതിന് ആഫ്രിക്കന്‍ യൂനിയന്‍ നിയോഗിച്ച സഖ്യസൈന്യത്തിലെ എത്യോപ്യന്‍ അംഗങ്ങളാണു കൊല്ലപ്പെട്ടത്.
ആക്രമണത്തില്‍ ഒട്ടേറെ സൈനികര്‍ക്കു പരുക്കേറ്റിട്ടുണ്ട്. തങ്ങളാണ് ആക്രമണം നടത്തിയതെന്ന് അല്‍ശബാബ് സ്ഥിരീകരിച്ചിട്ടുമുണ്ട്. എന്നാല്‍, കാര്‍ബോംബ് ആക്രമണത്തിനു ശേഷം നടന്ന ഏറ്റുമുട്ടലില്‍ ഒട്ടേറെ അല്‍ശബാബ് തീവ്രവാദികളും കൊല്ലപ്പെട്ടിട്ടുണ്ടെങ്കിലും ഇവരുടെ കൃത്യമായ എണ്ണം പുറത്തുവിട്ടിട്ടില്ല.