തിരുവനന്തപുരം: 2019-20 ലേക്കുള്ള തദ്ദേശസ്വയംഭരണ സ്ഥാപനങ്ങളുടെ വാര്‍ഷികപദ്ധതി സമര്‍പ്പണത്തിന്റെ കാര്യത്തില്‍ സര്‍വകാല റെക്കോര്‍ഡ്. 2019ല്‍ നടക്കുന്ന പൊതു തെരഞ്ഞെടുപ്പിന്റെ പശ്ചാത്തലത്തില്‍ പദ്ധതി നേരത്തെ തയാറാക്കി 2019 ഏപ്രില്‍ മുതല്‍ തന്നെ പദ്ധതി നിര്‍വഹണമാരംഭിക്കാന്‍ തദ്ദേശസ്വയംഭരണ വകുപ്പും പ്ലാനിങ് വകുപ്പും നടത്തിയ ശ്രമങ്ങളാണ് നേട്ടമുണ്ടാക്കിയിരിക്കുന്നത്.
2019-20 ലേക്കുള്ള വാര്‍ഷിക പദ്ധതി 19 തദ്ദേശസ്വയംഭരണ സ്ഥാപനങ്ങളൊഴികെ മുഴുവന്‍ തദ്ദേശസ്വയംഭരണ സ്ഥാപനങ്ങളും ജില്ലാ ആസൂത്രണ സമിതിക്ക് ഡിസംബര്‍ 31ന് മുന്‍പേ സമര്‍പ്പിച്ച് കഴിഞ്ഞു. 1181 സ്ഥാപനങ്ങളാണ് പദ്ധതി സമര്‍പ്പിച്ചത്. ഇടക്കാലത്ത് നടന്ന ഉപതെരഞ്ഞെടുപ്പുകളുള്‍പ്പെടെയുള്ള സാങ്കേതിക കാരണങ്ങളാണ് 19 സ്ഥാപനങ്ങള്‍ക്ക് പദ്ധതി സമര്‍പ്പിക്കാന്‍ കഴിയാതെ പോയത്. മുന്‍വര്‍ഷത്തെ അപേക്ഷിച്ച് പദ്ധതി നിര്‍വഹണത്തില്‍ 17.67 % മുന്നേറ്റം ഉണ്ടായി. 2017-18 സാമ്പത്തിക വര്‍ഷം ഇതേ സമയത്ത് 31.03 %മായിരുന്നു പദ്ധതി ചെലവ്. ജനപ്രതിനിധികളുടേയും ഉദ്യോഗസ്ഥരുടേയും ആത്മാര്‍ത്ഥമായ ഇടപെടലും വകുപ്പിന്റെ കൃത്യമായ മേല്‍നോട്ടവുമാണ് തദ്ദേശസ്വയംഭരണ വകുപ്പിന് ഈ നേട്ടം കൈവരിക്കാനായതെന്നും എല്ലാവരേയും അഭിനന്ദിക്കുന്നതായും മന്ത്രി എ.സി മൊയ്തീന്‍ അറിയിച്ചു.