നാപ്പൊളി: മാഞ്ചസ്റ്റര്‍ യുനൈറ്റഡില്‍ നിന്നെത്തിയ ലുക്കാക്കുവിലൂടെ വിജയത്തുടര്‍ച്ചയില്‍ ഇന്റര്‍ മിലാന്‍. താരം ഇരട്ടഗോളുമായി തിളങ്ങിയ മത്സരത്തില്‍ മികച്ച ടീം നാപ്പൊളിയെ 3-1നാണ് ടീം പരാജയപ്പെടുത്തിയത്. ജയത്തോടെ ഇന്റര്‍ സീരി എ പോയിന്റ് പട്ടികയില്‍ യുവന്റസിനെ പിന്നിലാക്കി ഒന്നാമതെത്തി. 18 കളികളില്‍നിന്ന് ഇന്ററിനും യുവന്റസിനും 45 പോയിന്റുണ്ടെങ്കിലും ഗോള്‍ ശരാശരിയില്‍ ഇന്റര്‍ ഒന്നാമതെത്തുകയായിരുന്നു.
കഴിഞ്ഞ മത്സരത്തില്‍ ഇന്റര്‍ ജിനോവയെ പരാജയപ്പെടുത്തിയപ്പോഴും ലുക്കാക്കുവിന്റെ കാലില്‍നിന്ന് ഇരട്ടഗോള്‍ പിറന്നിരുന്നു.
മത്സരത്തിലെ ആദ്യ പകുതിയില്‍ തന്നെ ലുക്കാക്കുവിന്റെ അക്കൗണ്ടില്‍ ഇരട്ടഗോള്‍ വന്നുചേര്‍ന്നു. 14ാം മിനുട്ടില്‍ ഒറ്റയാള്‍ മുന്നേറ്റത്തിലൂടെയായിരുന്നു ആദ്യ ഗോള്‍നേട്ടം. തുടര്‍ന്ന് 33ാം മിനുട്ടിലും മൈതാനത്തിന്റെ പകുതിയില്‍നിന്ന് പന്തുമായി മുന്നേറി വീണ്ടും വണ്‍മാന്‍ ഷോയിലൂടെ ഇന്ററിന്റെ ലീഡ് രണ്ടാക്കി ഉയര്‍ത്തി. ലുക്കാക്കു തൊടുത്ത ഷോട്ട് നാപ്പൊളി ഗോളിയുടെ കാലില്‍തട്ടി പന്ത് വലയില്‍ കയറുകയായിരുന്നു.
39ാം മിനുട്ടില്‍ അര്‍കദിസ് മിലിക്കിലൂടെ നാപ്പൊളി അക്കൗണ്ട് തുറന്നു. എന്നാല്‍ രണ്ടാം പകുതിയിലെ 62ാം മിനുട്ടില്‍ ലൗട്ടാറോ മാര്‍ട്ടിനെസ് മിലാന് മൂന്നാം ഗോളും സമ്മാനിച്ചു.
കഴിഞ്ഞ വര്‍ഷം ഓഗസ്റ്റിലാണ് താരം ഇംഗ്ലീഷ് ക്ലബ് മാഞ്ചസ്റ്റര്‍ യുനൈറ്റഡില്‍നിന്ന് ഇന്ററിലേക്കെത്തിയത്.