അരിസോണ: ഇഞ്ചോടിഞ്ച് പോരാട്ടം കണ്ട കോപ്പ അമേരിക്ക മത്സരത്തില്‍ ഇക്വഡോറിനെതിരേ പെറുവിന് സമനില. ഇരു ടീമുകളും രണ്ടു ഗോള്‍ വീതം നേടി സമനിലയില്‍ പിരിയുകയായിരുന്നു. ഹെയ്തിക്കെതിരേ വിജയിച്ച ടീമില്‍ മാറ്റങ്ങളൊന്നും വരുത്താതെയാണ് പെറു കളത്തിലിറങ്ങിയത്. ഇക്വഡോര്‍ ഗോളി എസ്‌തെബാന്‍ ഡ്രിയര്‍ക്ക് പകരം അലക്‌സാന്‍ഡര്‍ ഡൊമിന്‍ഗസിനെ കളത്തിലിറക്കി.  ആദ്യ പകുതിയില്‍ പെറു ആക്രമണം കൊണ്ടു മികച്ചു നിന്നു. അഞ്ചാം മിനുട്ടില്‍ തന്നെ പെറുവിനായി ക്രിസ്റ്റ്യന്‍ ക്യൂവ ആദ്യ ഗോള്‍ നേടി. പൗലോ ഗൊറേറോയുടെ പാസില്‍ ഇക്വഡോര്‍ പ്രതിരോധ താരം അക്കിലിയറിനെ കാഴ്ച്ചക്കാരനാക്കി ക്യൂവ വല ചലിപ്പിക്കുകയായിരുന്നു. ഗോള്‍ നേടിയതോടെ പെറു ആക്രമണം കടുപ്പിച്ചു. എട്ടു മിനുട്ടുകള്‍ക്ക് ശേഷം പെറു ലീഡ് ഉയര്‍ത്തി. റെന്‍സോ റിവോറെഡോയുടെ മികച്ചൊരു ഫ്രീകിക്കില്‍ ഗൊറേറോ ഫ്‌ളോറസിന് പാസ് നല്‍കി. താരം മികച്ചൊരു ഷോട്ടിലൂടെ ഗോള്‍ നേടി. പിന്നീട് റിവോറെഡോയ്ക്ക് സ്‌കോര്‍ ഉയര്‍ത്താന്‍ അവസരം ലഭിച്ചെങ്കിലും ലക്ഷ്യം കാണാന്‍ സാധിച്ചില്ല.
രണ്ടു ഗോള്‍ വഴങ്ങിയിട്ടും സമ്മര്‍ദത്തിനടിപെടാതെ കളിച്ച ഇക്വഡോര്‍ 38ാം മിനുട്ടില്‍ ഒരു ഗോള്‍ മടക്കി. എനര്‍ വലന്‍സിയയായിരുന്നു സ്‌കോറര്‍. അന്റോണിയോ വലന്‍സിയ ഒരുക്കികൊടുത്ത പാസില്‍ നിന്നായിരുന്നു ഗോള്‍.
രണ്ടാം പകുതിയിലും മികവ് തുടര്‍ന്ന ടീം 48ാം മിനുട്ടില്‍ സമനില ഗോള്‍ നേടി. ജേഫേഴ്‌സന്‍ മൊണ്ടേറോ ഒരുക്കികൊടുത്ത മികച്ച അവസരം മില്ലര്‍ ബൊലാനോസ് അനായാസം ലക്ഷ്യത്തിലെത്തിച്ചു.
ഗോള്‍ നേടിയ ശേഷവും ആക്രമിച്ചു കളിച്ച ഇക്വഡോര്‍ മൊണ്ടേറോയിലൂടെ ലീഡ് നേടുമെന്ന് കരുതിയെങ്കിലും പെറു ഗോളി പെഡ്രോ ഗല്ലെസെയുടെ മികവ ്അവര്‍ക്ക് ഗോള്‍ നിഷേധിക്കുകയായിരുന്നു. ഇക്വഡോര്‍ ആക്രമണം തുടര്‍ച്ചയായി നടത്തിയെങ്കിലും അവസാന നിമിഷം വരെ പ്രതിരോധിക്കാന്‍ പെറുവിന് സാധിച്ചു.