മാള: പുളിപ്പറമ്പ് പള്ളിയില്‍ കുര്‍ബാനയ്ക്കുപോയ വീട്ടമ്മയെ ആക്രമിക്കാന്‍ ശ്രമം നടത്തിയതായി പരാതി. ബൈക്കിലെത്തിയ രണ്ടംഗ സംഘമാണ് ആക്രമണശ്രമം നടത്തിയത്. വീട്ടമ്മ ധരിച്ചിരുന്ന മാല കവരുകയായിരുന്നു ലക്ഷ്യമെന്നു സംശയിക്കുന്നു.
കഴിഞ്ഞ ദിവസമാണു സംഭവം. അതിരാവിലെ പള്ളിയിലേക്കു നടന്നുപോകുന്നതിനിടെ പുളിപ്പറമ്പ് സ്‌കൂളിനു സമീപത്തുവച്ചാണ് ഹെല്‍മറ്റുധാരികളായ ബൈക്ക് യാത്രക്കാര്‍ എത്തിയത്. കല്ലെറിഞ്ഞു ബഹളം വച്ചതോടെയാണു മോഷ്ടാക്കള്‍ ബൈക്കില്‍ കടന്നുകളഞ്ഞത്. ഇവിടെനിന്ന് അധികംദൂരത്തല്ലാത്ത പൊയ്യയിലും സമാനസംഭവമുണ്ടായതായി വിവരം ലഭിച്ചിട്ടുണ്ട്.
കവര്‍ച്ചാസംഘങ്ങള്‍ വിലസുന്നതായി വിവരം ലഭിച്ചതിന്റെ അടിസ്ഥാനത്തില്‍ പുളിപ്പറമ്പ് പ്രദേശത്തു സ്ത്രീകള്‍ ആഭരണങ്ങള്‍ ധരിക്കാതെയാണ് ഇപ്പോള്‍ രാവിലെ പള്ളിയില്‍ പോകാറ്. പലപ്പോഴും ഭയംമൂലം കൂട്ടംചേര്‍ന്നാണു സ്ത്രീകള്‍ പള്ളിയില്‍ പോകുന്നത്. മാള പൊലിസ് സ്റ്റേഷന്‍ ക്വാര്‍ട്ടേഴ്‌സിനു സമീപം ദേഹത്ത് ഓയില്‍പുരട്ടി മോഷ്ടാവെത്തിയതായി പരിസരവാസികള്‍ പറഞ്ഞു.
മുന്‍പ് മാള പൊലിസ് സ്റ്റേഷന്‍ റോഡിലൂടെ രാവിലെ പള്ളിയിലേക്കു പോകുകയായിരുന്ന സ്ത്രീകള്‍ക്കു നേരെയും മോഷണശ്രമം റിപ്പോര്‍ട്ട് ചെയ്തിട്ടുണ്ട്. വീട്ടമ്മമാര്‍ തന്നെയായിരുന്നു ഇവിടെയും മോഷ്ടാക്കളുടെ ഇര. പുത്തന്‍ച്ചിറ കണ്ണിക്കുളങ്ങര പ്രദേശത്തും മോഷ്ടാക്കള്‍ ഇതേരീതിയില്‍ മോഷണശ്രമം നടത്തിയതായി പറയുന്നു. തുടര്‍ന്നു നാട്ടുകാര്‍ രാത്രി കാവലിരുന്നെങ്കിലും മോഷ്ടാക്കളെ പിടികൂടാനായിട്ടില്ല.
മേഖലയില്‍ പൊലിസ് രാത്രികാല പട്രോളിങ് ശക്തമാക്കണമെന്ന ആവശ്യം ശക്തമായിട്ടുണ്ട്.