ന്യൂഡല്‍ഹി: ജെ.എന്‍.യുവില്‍ അക്രമിക്കപ്പെട്ട വിദ്യാര്‍ത്ഥികള്‍ക്ക് പിന്തുണയുമായെത്തിയ ബോളിവുഡ് താരം ദീപിക പദുക്കോണിനെതിരെ കേന്ദ്ര സര്‍ക്കാരിന്റെ പ്രതികാര നടപടി. ആസിഡ് ആക്രമത്തില്‍ ഇരയായവരെ കുറിച്ചും സ്‌കില്‍ ഇന്ത്യ പദ്ധതിയെ കുറിച്ചും ദീപിക സംസാരിക്കുന്ന പ്രൊമോഷന്‍ വീഡിയോ വേണ്ടെന്ന് നൈപുണ്യ വികസന മന്ത്രാലയം തീരുമാനിച്ചെന്ന് ദ പ്രിന്റ് റിപ്പോര്‍ട്ട് ചെയ്തു.

ദീപിക പദുക്കോണിന്റെ പുതിയ ചിത്രം ചപാക്ക് ആസിഡ് ആക്രമണത്തിന് ഇരയായവരുടെ ജീവിതമാണ് ചര്‍ച്ച ചെയ്യുന്നത്. ഇതിന്റെ ഭാഗമായാണ് ദീപിക നൈപുണ്യ വികസന മന്ത്രാലയത്തിന്റെ വീഡിയോയില്‍ പങ്കാളിയായത്. എന്നാല്‍ ജെ.എന്‍.യുവിലെ വിദ്യാര്‍ത്ഥികളെ പിന്തുണച്ച ദീപികയ്‌ക്കെതിരെ ആര്‍.എസ്.എസുകാര്‍ തിരിഞ്ഞതോടെ സര്‍ക്കാര്‍ തീരുമാനം മാറ്റുകയായിരുന്നു.

സ്‌കില്‍ ഇന്ത്യയെ പ്രമോട്ട് ചെയ്യുന്ന ദീപിക പദുക്കോണ്‍ അവതരിപ്പിക്കുന്ന വീഡിയോ ഇന്നായിരുന്ന പുറത്തിറക്കാന്‍ തീരുമാനിച്ചത്. വീഡിയോ നൈപുണ്യ വികസന മന്ത്രാലയത്തില്‍ പ്രചരിക്കുകയും ചെയ്തിരുന്നു. എന്നാല്‍ കഴിഞ്ഞ ദിവസത്തെ സംഭവത്തോടെ വീഡിയോ വേണ്ടെന്ന് തീരുമാനിച്ചെന്ന് മുതിര്‍ന്ന ഉദ്യോഗസ്ഥന്‍ പറഞ്ഞെന്ന് കാട്ടിയാണ് ദ പ്രിന്റ് വാര്‍ത്ത നല്‍കിയത്.

ഇതിനിടെ ദീപകയുടെ പുതിയ സിനിമയായ ചാപ്പക്കിന്റെ പ്രദര്‍ശനത്തിന് നികുതി ഇളവ് നല്‍കി മധ്യപ്രദേശ് മുഖ്യമന്ത്രി കമല്‍നാഥ് രംഗത്തെത്തി. എന്നാല്‍ ആസിഡ് അറ്റാക്കില്‍ നിന്നും രക്ഷപ്പെട്ട പെണ്‍കുട്ടിയുടെ കഥ പറയുന്ന സിനിമക്കാണ് നികുതി ഇളവ് നല്‍കുന്നതെന്ന പ്രസ്താവനയാണ് കമല്‍നാഥ് നടത്തിയത്. ചത്തീസ്ഗഡിലും നികുതിയില്ലാതെ സിനിമ പ്രദര്‍ശിപ്പിക്കുമെന്ന് മുഖ്യമന്ത്രി വ്യക്തമാക്കിയിട്ടുണ്ട്്.