റാംപൂർ: ഉത്തർപ്രദേശിലെ റാംപൂരിൽ കഴിഞ്ഞ ശനിയാഴ്ച നടന്ന വിവാഹത്തിന് പിന്നാലെ ഉണ്ടായ സംഭവം വലിയ വിവാദമായി. വിവാഹ രാത്രിയിൽ വരൻ വധുവിനോട് ഗർഭ പരിശോധനാ കിറ്റ് ഉപയോഗിക്കാൻ ആവശ്യപ്പെട്ടത് ഇരുവീട്ടുകാർ തമ്മിലുള്ള സംഘർഷത്തിലേക്ക് നയിച്ചു. ഒടുവിൽ, വരൻ പരസ്യമായി ക്ഷമാപണം നടത്തേണ്ടി വന്നതായി റിപ്പോർട്ടുകൾ.

വിവാഹം കഴിഞ്ഞ് വൈകിയാണ് വരനും വധുവും വരന്റെ വീട്ടിലെത്തിയത്. എത്തിയ ഉടനെ, വധു ഛർദ്ദിച്ചത് വരനിൽ സംശയമുണ്ടാക്കി. ക്ഷീണവും ചൂടും മൂലം തലകറക്കം അനുഭവപ്പെട്ട വധു ഛർദ്ദിച്ചതിനെ തുടർന്ന്, വരന്റെ സുഹൃത്തുക്കൾ തമാശയ്ക്ക് വധു ഗർഭിണിയാണെന്ന് പറഞ്ഞു. ഇത് വരനെ അസ്വസ്ഥനാക്കി, രാത്രി തന്നെ ഒരു മെഡിക്കൽ സ്റ്റോറിൽനിന്ന് ഗർഭ പരിശോധനാ കിറ്റ് വാങ്ങാൻ പ്രേരിപ്പിച്ചു.

വരന്റെ ഈ ആവശ്യം ഞെട്ടിയ വധു, തന്റെ വീട്ടുകാരെ വിളിച്ചുവരുത്തി. രാത്രിയോടെ വരന്റെ വീട്ടിലെത്തിയ വധുവിന്റെ കുടുംബവും വരനും തമ്മിൽ വാക്കേറ്റമുണ്ടായി. ഗ്രാമവാസികളുടെ ഇടപെടലോടെ, രാത്രി തന്നെ പഞ്ചായത്ത് വിളിച്ചുചേർത്തു. ഏകദേശം രണ്ട് മണിക്കൂർ നീണ്ട ചർച്ചയ്ക്കൊടുവിൽ, വരൻ തന്റെ തെറ്റ് സമ്മതിച്ച് വധുവിനോടും കുടുംബത്തോടും പരസ്യമായി ക്ഷമാപണം നടത്തി. ഇനി ഇത്തരം പെരുമാറ്റം ആവർത്തിക്കില്ലെന്ന് പഞ്ചായത്തിന് വാക്ക് നൽകിയതായും റിപ്പോർട്ടുകൾ പറയുന്നു.