ലഖ്‌നോ: തെരഞ്ഞെടുപ്പില്‍ അടിതെറ്റിയെന്ന് തിരിച്ചറിഞ്ഞതോടെ വര്‍ഗീയ കാര്‍ഡ് ഇളക്കി രംഗത്തുവന്ന പ്രധാനമന്ത്രി നരേന്ദ്ര മോദിക്കും ബി.ജെ.പി ദേശീയാധ്യക്ഷന്‍ അമിത്ഷാക്കും എതിരേ സമാജ് വാദി പാര്‍ട്ടി നേതാവ് രാജേന്ദ്ര ചൗധരി.
ജനങ്ങളില്‍ ഭീതി വിതക്കുന്ന രണ്ട് ഭീകരരാണ് മോദിയും അമിത്ഷായുമെന്നാണ് അദ്ദേഹം ഇന്നലെ ലഖ്‌നോയില്‍ പറഞ്ഞത്.
കഴിഞ്ഞ ഞായറാഴ്ച പ്രധാനമന്ത്രി മോദി ഫത്തേപൂരില്‍ നടത്തിയ വര്‍ഗീയ പ്രസംഗത്തോട് പ്രതികരിച്ചാണ് അദ്ദേഹം ഭീകരവാദ പ്രയോഗം നടത്തിയത്. ഭീകരരായ മോദിയും അമിത്ഷായും ജനാധിപത്യത്തില്‍ ഭീകരത വളര്‍ത്തുകയാണ്.
ഇത് ജനങ്ങള്‍ കരുതിയിരിക്കണമെന്ന് അദ്ദേഹം ഒരു പൊതുയോഗത്തില്‍ പറഞ്ഞു.ബി.ജെ.പിയുടെ രാഷ്ട്രീയ രംഗത്ത് അമിത്ഷാ ഒന്നുമല്ല. മോദി പറയുന്നത് മാത്രം അനുസരിക്കുന്ന ഒരാളാണ് അദ്ദേഹം. ജനങ്ങളില്‍ ഭീതി വളര്‍ത്തുന്നതിനുപുറമെ ബി.ജെ.പി പ്രവര്‍ത്തകരെയും മോദി ഭയപ്പെടുത്തി നിര്‍ത്തിയിരിക്കുകയാണ്.
ഉത്തര്‍പ്രദേശിലെ രാഷ്ട്രീയ പരിസ്ഥിതിയെ ഇരു നേതാക്കളും മലീമസമാക്കിയിരിക്കുകയാണ്. ഇതുതന്നെയാണ് രാജ്യത്താകമാനം ഇവര്‍ ചെയ്തുകൊണ്ടിരിക്കുന്നത്.
ഉത്തര്‍പ്രദേശിലെ ജനങ്ങളെ അവഹേളിക്കുന്ന ഇരുവരെയും ബി.ജെ.പി പ്രവര്‍ത്തകര്‍ ഉള്‍പ്പെടെയുള്ളവര്‍ തള്ളിക്കളയണമെന്നും അദ്ദേഹം ആവശ്യപ്പെട്ടു. അതേസമയം ചൗധരിയുടെ ആരോപണത്തിന് തൊട്ടുപിന്നാലെ ശക്തമായ എതിര്‍പ്പുമായി രാജ്യസഭാ അംഗവും ബി.ജെ.പിയുടെ യു.പിയുടെ ചുമതലയുള്ള നേതാവുമായ ഓം പ്രകാശ് മാഥൂര്‍ രംഗത്തെത്തി.
ചൗധരിയുടെ ആരോപണം ലജ്ജിപ്പിക്കുന്നതാണെന്ന് പറഞ്ഞ അദ്ദേഹം പ്രധാനമന്ത്രിക്കെതിരായ ഇത്തരത്തിലുള്ള ആരോപണം വഞ്ചനാപരമാണെന്നും ന്യൂനപക്ഷ വോട്ടുകള്‍ ഏകീകരിക്കുന്നതിനുള്ള എസ്.പിയുടെ ആസൂത്രിത നീക്കമാണ് ഇതിന് പിന്നിലെന്നും ഒംപ്രകാശ് മാഥൂര്‍ പറഞ്ഞു.