നിലമ്പൂര്‍: ലഹരി വിരുദ്ധ പ്രവര്‍ത്തകനും ജൂനിയര്‍ ഹെല്‍ത്ത് ഇന്‍സ്‌പെക്ടറുമായ യുവാവ് ചാരായം വാറ്റുന്നതിനിടെ എക്‌സൈസ് സംഘത്തിന്റെ പിടിയിലായി. ചാലിയാര്‍ പഞ്ചായത്തിലെ പണപൊയിലില്‍ കമ്മത്ത് വീട്ടില്‍ സുനില്‍ കുമാ(45)റാണ് പിടിയിലായത്. ഭാര്യയുടെ പേരിലുള്ള പണപൊയിലിലെ ആളൊഴിഞ്ഞ വീട്ടില്‍വച്ച് ചാരായം വാറ്റുന്നതിനിടെയാണ് പിടിയിലായത്. എക്‌സൈസ് കമ്മിഷണര്‍ക്ക് ലഭിച്ച പരാതിയുടെ അടിസ്ഥാനത്തില്‍ എക്‌സൈസ് ഇന്‍സ്‌പെക്ടര്‍ കെ.ടി സജിമോനും സംഘവും വ്യാഴാഴ്ച രാത്രി 11.30ന് നടത്തിയ തിരച്ചിലിലാണ് സുനില്‍ കുമാര്‍ വാറ്റുപകരണങ്ങള്‍ സഹിതം പിടിയിലായത്. രണ്ട് ലിറ്റര്‍ വാറ്റുചാരായം, 40 ലിറ്റര്‍ വാഷ്, പ്രഷര്‍കുക്കര്‍, ഗ്യാസ് സ്റ്റൗ, സിലിണ്ടര്‍, പൈപ്പ് എന്നിവ പിടിച്ചെടുത്തു. ചുങ്കത്തറ സി.എച്ച്.സിയില്‍ ജൂനിയര്‍ ഹെല്‍ത്ത് ഇന്‍സ്‌പെക്ടറായി ജോലി നോക്കുന്ന സുനില്‍കുമാര്‍ ഇടതു പക്ഷ സര്‍വിസ് സംഘടനയുടെ സജീവ പ്രവര്‍ത്തകനാണ്. രാഷ്ട്രീയ സമ്മര്‍ദ്ദത്തെ തുടര്‍ന്ന് കേസില്‍ നിന്നും ഒഴിവാക്കാന്‍ ശ്രമം നടന്നുവെങ്കിലും നാട്ടുകാര്‍ സംഘടിച്ചതിനെ തുടര്‍ന്ന് ഇന്നലെ രാവിലെയാണ് കേസ് ചാര്‍ജ് ചെയ്തത്. വിവിധ കേന്ദ്രങ്ങളില്‍ ആരോഗ്യവകുപ്പിന്റെ ബോധവല്‍ക്കരണ ക്യാംപുകള്‍, ലഹരി വിരുദ്ധ ക്ലാസുകള്‍ എന്നിവയില്‍ സ്ഥിരം പങ്കാളിയാണ്. വിവിധ സ്‌കൂളുകളില്‍ പി.ടി.എ പ്രസിഡന്റ് പദവിയും ഉണ്ട്. പ്രിവന്റീവ് ഓഫിസര്‍ മുസ്തഫ ചോലയില്‍, സിവില്‍ എക്‌സൈസ് ഓഫിസര്‍മാരായ അബ്ദുല്‍ റഷീദ്, ജി. അഭിലാഷ്, കെ.ആര്‍. ജസ്റ്റിന്‍, കെ. പ്രദീപ് കുമാര്‍, വനിതാ സിവില്‍ എക്‌സൈസ് ഓഫിസര്‍ ഇ. ഷീന എന്നിവരും സംഘത്തിലുണ്ടായിരുന്നു.