തിരുവനന്തപുരം: കളിയിക്കാവിളയില്‍ പൊലിസ് എ.എസ്.ഐ വില്‍സനെ വെടിവച്ചു കൊന്ന കേസില്‍ നാലുപേരെ പൊലിസ് പിടികൂടി. തെന്‍മലയില്‍ വച്ച് കൊല്ലം റൂറല്‍ പൊലിസും തമിഴ്‌നാട് ക്യൂ ബ്രാഞ്ചും ചേര്‍ന്നാണ് ഇവരെ പിടികൂടിയത്. പിടികൂടിയവരില്‍ ഒരാള്‍ കൃത്യത്തില്‍ നേരിട്ടുപങ്കെടുത്തയാളാണ്. കൃത്യം നടത്തിയശേഷം സംഘം കേളത്തിലെത്തിയതായി പൊലിസിന് വിവരം ലഭിച്ചിരുന്നു.

തെന്‍മല പിന്നിട്ട് കഴുതരുട്ടിയിലെ ഒരു ഹോട്ടലില്‍ കയറി ഭക്ഷണം കഴിക്കുകയായിരുന്ന ഇവരെ തെന്‍മല സി.ഐയുടെ നേതൃത്വത്തിലുള്ള സംഘം രഹസ്യമായി പിന്‍തുടരുന്നുണ്ടായിരുന്നു. ആയുധങ്ങള്‍ കയ്യിലുണ്ടെന്ന സംശയത്തെ തുടര്‍ന്ന് നേരിട്ടുള്ള ആക്രമണത്തില്‍ നിന്നും പൊലിസ് പിന്‍മാറി. ഇവിടെ നിന്നും പാലരുവിയിലെത്തിയ സംഘം വെള്ളച്ചാട്ടത്തില്‍ കുളിക്കാന്‍ പോയി. കുളിച്ചതിന് ശേഷം തിരികേ വാഹനത്തില്‍ കയറി ജംഗ്ഷനിലെത്തിയ ഇവരെ പൊലിസ് പിടികൂടുകയായിരുന്നു.

രക്ഷപ്പെടാതിരിക്കാന്‍ ദേശീയപാതയില്‍ ലോറി കുറുകെയിട്ട് ഗതാഗതം തടഞ്ഞിരുന്നു. ഇവരെ പിന്നീട് തമിഴ്‌നാട് ക്യൂബ്രാഞ്ച് കസ്റ്റഡിയില്‍ വാങ്ങി.