പാനൂര്‍ (കണ്ണൂര്‍): പാനൂര്‍ കൊളവല്ലൂരില്‍ വന്‍ ബോംബ് വേട്ട. 18 നാടന്‍ ബോംബുകളാണ് പിടികൂടിയത്. എസ്.ഐ ബി. രാജഗോപാലും സംഘവും നടത്തിയ റെയ്ഡിലാണ് ചേരിക്കല്‍ ക്വാറി ഭാഗത്തുനിന്ന് ബോംബുകള്‍ കണ്ടെത്തിയത്. ഉഗ്രസ്‌ഫോടന ശേഷിയുള്ളതാണ് ബോംബുകള്‍.
ഇവ അടുത്തിടെ നിര്‍മിച്ചതാണെന്നാണ് സൂചന. ബോംബ് നിര്‍മാണ കേന്ദ്രവും ഇവിടെ കണ്ടെത്തിയിട്ടുണ്ടെന്ന് പൊലിസ് പറഞ്ഞു. വാഹന സൗകര്യം പോലും ഇല്ലാതെ എത്തിപ്പെടാന്‍ പ്രയാസമുള്ള സ്ഥലമാണിത്. അനധികൃത ക്വാറികള്‍ ഏറെയുള്ളതിനാല്‍ ഉഗ്രസ്‌ഫോടനശേഷിയുള്ള വെടിമരുന്ന് ഉള്‍പ്പെടെ ഇവിടെ സുലഭമായി ലഭിക്കുന്നുണ്ട്.
ഹര്‍ത്താല്‍ ദിനത്തില്‍ പൊലിസ് ജീപ്പ് തകര്‍ത്ത കേസിലെ പ്രതികള്‍ക്കായി നടത്തിയ റെയ്ഡിനിടെയാണ് ബോംബുകള്‍ കണ്ടെത്തിയത്.