ലക്‌നൗ: ഉത്തര്‍ പ്രദേശിലെ കാണ്‍പൂരില്‍ സ്ത്രീയെ ഒരു സംഘം അടിച്ചു കൊന്നു. ഇവരുടെ മകളെ കൂട്ടബലാത്സംഗം ചെയ്ത സംഘത്തിന്റെ ആക്രമണത്തെ തുടര്‍ന്നാണ് നാല്‍പതുകാരിയായ സ്ത്രീ മരിച്ചത്. വെള്ളിയാഴ്ചയാണ് ആശുപത്രിയില്‍ ഇവരുടെ മരണം സംഭവിച്ചത്.

രണ്ടുവര്‍ഷം മുമ്പാണ് ആബിദ്, മിന്റു, മഹ്ബൂബ്, ചാന്ദ് ബാബു, ജമീല്‍, ഫിറോസ് എന്നിവര്‍ 13 വയസുള്ള ഇവരുടെ മകളെ കൂട്ടബലാത്സംഗം ചെയ്ത കേസില്‍ അറസ്റ്റിലായത്. ജയിലിലായിരുന്ന പ്രതികള്‍ ഈയിടെയാണ് ജാമ്യത്തില്‍ ഇറങ്ങിയത്. കഴിഞ്ഞയാഴ്ച ഇവര്‍ പെണ്‍കുട്ടിയെയും അമ്മയെയും കാണാനെത്തിയിരുന്നു. കേസില്‍ നിന്ന് പിന്‍മാറണമെന്നും പരാതി പിന്‍വലിക്കണമെന്നും ഇവര്‍ ആവശ്യപ്പെട്ടത് തള്ളിക്കളഞ്ഞതോടെയായിരുന്നു ക്രൂരമായ മര്‍ദനം.

വ്യാഴാഴ്ചയാണ് സംഘം പെണ്‍കുട്ടിയുടെ വീട്ടിലെത്തിയത്. ഇവരുടെ ആവശ്യം നിഷേധിച്ചതോടെ ഇവരെ അതിക്രൂരമായി മര്‍ദ്ദിക്കുകയായിരുന്നു. പെണ്‍കുട്ടിയുടെ അമ്മയെയും മറ്റൊരു സ്ത്രീയെയും ആശുപത്രിയില്‍ പ്രവേശിപ്പിച്ചു. അമ്മ മരിച്ചു.

സംഭവത്തില്‍ മൂന്ന് പേരെ അറസ്റ്റ് ചെയ്തതായി പൊലിസ് പറഞ്ഞു. പൊലിസ് ഏറ്റുമുട്ടലിലാണ് ഇവരിലൊരാളെ അറസ്റ്റ് ചെയ്തത്. മറ്റ് മൂന്ന് പേര്‍ക്കായി പൊലിസ് തിരിച്ചില്‍ തുടരുകയാണ്.