നിസാര്‍ കലയത്ത്#

ജിദ്ദ: സ്വദേശിവല്‍ക്കരണം പാലിച്ചിട്ടുണ്ടെന്ന് ഉറപ്പ് വരുത്തുന്നതിനുള്ള പരിശോധന ഭയന്ന് രാജ്യത്ത് നിരവധി ഷോപ്പുകള്‍ അടഞ്ഞ് കിടന്നു. 12 മേഖലയിലെ സഊദിവത്ക്കരണ പ്രക്രിയയിലെ മൂന്നാം ഘട്ടം കഴിഞ്ഞ തിങ്കളാഴ്ച മുതലാണു ആരംഭിച്ചത്. അന്ന് മുതല്‍ സ്ഥാപനങ്ങളില്‍ ശക്തമായ പരിശോധനകളുണ്ടാകുമെന്ന് അധികൃതര്‍ നേരത്തെ തന്നെ മുന്നറിയിപ്പ് നല്‍കിയിരുന്നു.
ഈസ്‌റ്റേണ്‍ പ്രവിശ്യകളിലും രാജ്യത്തെ മറ്റു പ്രവിശ്യകളിലും നിരവധി കടകളാണു കഴിഞ്ഞ രണ്ടു ദിവസങ്ങളായി അടഞ്ഞ് കിടന്നതെന്ന് റിപ്പോര്‍ട്ട് പറയുന്നു. മെഡിക്കല്‍ എക്യുപ്‌മെന്റ്‌സ് വില്‍ക്കുന്ന കടകള്‍ പകുതിയും ചൊവ്വാഴ്ചയും തുറന്നിരുന്നില്ല.
സഊദിവത്ക്കരണ നിയമങ്ങള്‍ കൂടുതല്‍ സഊദികളെ ജോലിക്ക് നിയമിക്കാന്‍ തൊഴിലുടമകളെ പ്രാപ്തരാക്കുമെന്നും അത് തൊഴിലില്ലായ്മ ഇല്ലാതാക്കുമെന്നുമാണു വിലയിരുത്തല്‍.
കെട്ടിടനിര്‍മ്മാണ ഉപകരണങ്ങള്‍ വില്‍ക്കുന്ന ഷോപ്പുകള്‍, കാര്‍ സ്‌പെയര്‍ പാര്‍ട്‌സ് ഷോപ്പുകള്‍, മെഡിക്കല്‍ ഉപകരണങ്ങള്‍ വില്‍ക്കുന്ന ഷോപ്പുകള്‍, കാര്‍പ്പറ്റ് ഷോപ്പുകള്‍, ബേക്കറികള്‍ എന്നിവയാണു തിങ്കളാഴ്ച മുതല്‍ 70 ശതമാനം സഊദിവത്ക്കരണത്തിനു വിധേയമായത്.
കഴിഞ്ഞ സെപ്തംബര്‍ 11 മുതലായിരുന്നു സഊദിവത്ക്കരണം 12 മേഖലകളില്‍ ബാധകമാക്കുന്ന നിയമം ഒന്നാം ഘട്ടം ആരംഭിച്ചത്. ആദ്യ ഘട്ടത്തില്‍ കാര്‍,ബൈക്ക് ഷോറൂമുകള്‍, റെഡിമെയ്ഡ് ഗാര്‍മന്റ്‌സ്, ഹോം ആന്റ് ഓഫീസ് ഫര്‍ണീച്ചര്‍, പാത്രക്കടകള്‍ എന്നിവയാണു സഊദിവത്ക്കരണത്തിനു വിധേയമായത്. പിന്നീട് നവംബര്‍ 9 മുതല്‍ ഇലക്ട്രിക്കല്‍ ആന്റ് ഇലക്ട്രോണിക് ഷോപ്പുകള്‍, വാച്ച് കടകള്‍, കണ്ണടക്കടകള്‍ എന്നിവയും 70 ശതമാനം സഊദിവത്ക്കരണത്തിനു വിധേയമായി.
അതേ സമയം സഊദിവത്ക്കരണം പിന്നീട് രണ്ട് മേഖലകളിലേക്ക് കൂടെ നീട്ടിക്കൊണ്ടുള്ള നിയമത്തിനു തൊഴില്‍ മന്ത്രി കഴിഞ്ഞയാഴ്ച അംഗീകാരം നല്‍കിയിട്ടുണ്ട്. അത്തര്‍ കടകളും എല്ലാ തരം തുണിത്തരങ്ങള്‍ വില്‍ക്കുന്ന കടകളുമാണു പുതുതായി സഊദിവത്ക്കരണത്തിനു വിധേയമാകുക. ഇതോടെ 70 ശതമാനം സഊദിവത്ക്കരണം 14 മേഖലകളിലേക്ക് കടന്നിരിക്കുകയാണു.
അതോടൊപ്പം സഊദിയിലെ പ്രവാസികള്‍ക്ക് വലിയ തിരിച്ചടിയായിക്കൊണ്ട് ചെറുകിട സ്ഥാപനങ്ങള്‍ക്കും ലെവി വരുമെന്ന് റിപ്പോര്‍ട്ട് വന്നിട്ടുണ്ട്. ജോലിക്കാര്‍ എണ്ണത്തില്‍ കുറവായ കഫീലുമാരുടെ കീഴില്‍ ലെവി കൊടുക്കാതെ കഴിഞ്ഞിരുന്ന പ്രവാസികളെ ഇത് ദോഷകരമായി ബാധിക്കും. ഈ വരുന്ന മെയ് മുതല്‍ നിലവില്‍ ലെവി ഇളവ് ആനുകൂല്യം അനുഭവിക്കുന്ന എല്ലാ ചെറുകിട സ്ഥാപനങ്ങള്‍ക്കും ലെവി ബാധകമാകുമെന്നാണു റിപ്പോര്‍ട്ടിലുള്ളത്.