ന്യൂഡല്‍ഹി: രാജ്യത്തെ മെഡിക്കല്‍ കോഴ്‌സുകളിലേക്കുള്ള ഏകീകൃത പൊതുപ്രവേശന പരീക്ഷയായ 'നീറ്റ്' ഉര്‍ദുവിലും നടത്തണമെന്നാവശ്യപ്പെടുന്ന ഹരജി അടിയന്തരമായി പരിഗണിക്കണമെന്ന ആവശ്യം സുപ്രിംകോടതി നിരസിച്ചു. നിലവില്‍ ഇംഗ്ലീഷും ഹിന്ദിയുമടക്കം 10 ഭാഷകളില്‍ നീറ്റ് പരീക്ഷ നടത്താന്‍ കേന്ദ്രസര്‍ക്കാര്‍ തീരുമാനിച്ചിട്ടുണ്ട്. കേന്ദ്ര മാനവവിഭവ ശേഷി മന്ത്രാലയത്തിന്റെ ഉത്തരവ് പ്രകാരം ഇംഗ്ലീഷിനും ഹിന്ദിക്കും പുറമെ അസമീസ്, ബംഗാളി, ഗുജറാത്തി, മറാത്തി, തമിഴ്, തെലുങ്ക്, ഒറിയ, കന്നഡ എന്നീ ഭാഷകളിലും നീറ്റ് പരീക്ഷ നടത്താനാണ് തീരുമാനമായത്. എന്നാല്‍, ഇതില്‍ ഉര്‍ദു ഭാഷയും ഉള്‍പ്പെടുത്തണമെന്നാവശ്യപ്പെട്ട് എസ്.ഐ.ഒ ആണ് സുപ്രിംകോടതിയെ സമീപിച്ചത്.  ഹരജി അടുത്തമാസം മൂന്നിന് പരിഗണിക്കും.