ന്യൂഡല്‍ഹി: ഡല്‍ഹി നിയമസഭാ തെരഞ്ഞെടുപ്പിലേക്കുള്ള നാമനിര്‍ദേശ പത്രിക സമര്‍പ്പിക്കാന്‍ മുഖ്യമന്ത്രി അരവിന്ദ് കെജരിവാള്‍ കാത്തുനിന്നത് മണിക്കൂറുകളോളം. പത്രിക സമര്‍പ്പിക്കുന്നതിന്റെ അവസാന ദിനമായ ചൊവ്വാഴ്ച അപ്രതീക്ഷിതമായി സ്വതന്ത്ര സ്ഥാനാര്‍ഥികളുടെ നീണ്ടനിര പ്രത്യക്ഷപ്പെട്ടതാണ് കെജരിവാളിന് കാത്തുനില്‍ക്കേണ്ട അവസ്ഥ സൃഷ്ടിച്ചത്. നാല്‍പ്പത്തിയഞ്ചാം നമ്പര്‍ ടോക്കണാണ് കെജരിവാളിന് ലഭിച്ചത്. വിഷയത്തില്‍ ഗൂഢാലോചനയുണ്ടെന്ന് ആരോപിച്ച് ആം ആദ്മി പാര്‍ട്ടി രംഗത്തെത്തി.

അതേ സമയം പത്രികസമര്‍പ്പിക്കാന്‍ ആളുകള്‍ വര്‍ധിച്ചതില്‍ കെജ്‌രിവാള്‍ സന്തോഷം രേഖപ്പെടുത്തി. 'നോമിനേഷന്‍ സമര്‍പ്പിക്കുന്നതിനായി കാത്തുനില്‍ക്കുകയാണ്. എന്റെ ടോക്കണ്‍ നമ്പര്‍ 45 ആണ്. നാമനിര്‍ദേശ പത്രിക സമര്‍പ്പിക്കുന്നതിന് നിരവധി പേരാണ് എത്തിയിരിക്കുന്നത്. ജനാധിപത്യപരമായ പ്രക്രിയയില്‍ പങ്കെടുക്കാന്‍ നിരവധിപേര്‍ എത്തുന്നതില്‍ സന്തോഷമുണ്ട്'-കെജരിവാള്‍ ട്വിറ്ററില്‍ കുറിച്ചു.

100 പേരാണ് പത്രിക സമര്‍പ്പിക്കാനായി ഡല്‍ഹി ജാമ്നഗര്‍ ഹൗസില്‍ എത്തിയിരിക്കുന്നത്. നാമനിര്‍ദേശ പത്രിക സമര്‍പ്പിക്കാനെത്തിയവരുടെ ക്യൂ നീണ്ടതോടെ അധികൃതര്‍ ടോക്കണ്‍ ഏര്‍പ്പെടുത്തി. ഉച്ചകഴിഞ്ഞ് മൂന്നുമണിക്കുള്ളില്‍ ഓഫീസിലെത്തിയ എല്ലാവര്‍ക്കും പത്രിക സമര്‍പ്പിക്കാന്‍ അവസരമുണ്ടാകുമെന്ന് അധികൃതര്‍ വ്യക്തമാക്കിയിട്ടുണ്ട്.