മാനന്തവാടി: കാറില്‍ സഞ്ചരിക്കവേ സ്വര്‍ണക്കച്ചവടക്കാരെ അക്രമിച്ച് 25 ലക്ഷം രൂപയും മൊബൈല്‍ ഫോണുകളും കവര്‍ന്ന കേസില്‍ മൂന്ന് പേര്‍ കൂടി അറസ്റ്റില്‍.കണ്ണൂര്‍ താവക്കര ഷാലോം വീട്ടില്‍ ഷമേജ് ദേവദാസ്(44), കണ്ണൂര്‍ അഞ്ചരക്കണ്ടി മൗവ്വഞ്ചേരി ഏച്ചൂര്‍ മേച്ചേരി ശ്രീപുരം വീട്ടില്‍ രഞ്ജിത്ത്(34), കേണിച്ചിറ ചൂതുപാറ അമ്പശേരില്‍ നിധിന്‍ പീയൂസ്(23) എന്നിവരെയാണ് മാനന്തവാടി എ.എസ്.പിയുടെ പ്രത്യേക സ്‌ക്വാഡും തിരുനെല്ലി പൊലിസും പിടികൂടിയത്. ഇതോടെ സംഭവത്തില്‍ അറസ്റ്റിലായവരുടെ എണ്ണം എട്ടായി. അഞ്ചു പേരെ കഴിഞ്ഞ ദിവസങ്ങളിലായി കസ്റ്റഡിയിലെടുത്തിരുന്നു. ഡിസംബര്‍ 17നായിരുന്നു കേസിനാസ്പദമായ സംഭവം. തിരുനെല്ലി പൊലിസ് സ്റ്റേഷന്‍ പരിധിയിലെ കാട്ടിക്കുളം താഴെ 54ല്‍ വച്ചാണ് വ്യാപാരികള്‍ സഞ്ചരിച്ച കാര്‍ തടഞ്ഞു നിര്‍ത്തി കവര്‍ച്ച നടത്തിയത്.