കൊയിലാണ്ടി: ലഹരി ഗുളികകളുമായി രണ്ടു യുവാക്കള്‍ പിടിയില്‍. ചെങ്ങോട്ടുകാവ്, എടക്കുളം മാളിയേക്കല്‍ വീട്ടില്‍ മുന്‍ഷീദ് (19), കോഴിക്കോട് വെസ്റ്റ്ഹില്‍ കലക്ടര്‍ ബംഗ്ലാവിനു സമീപം വസന്ത് നിവാസില്‍ നിമേഷ് ( 20)എന്നിവരെയാണ് കൊയിലാണ്ടി എക്‌സൈസ് സംഘം അറസ്റ്റ് ചെയ്തത്.
ഇവരില്‍ നിന്ന് നിട്രാസെന്‍, നിട്രാസോഫാം ഇനത്തില്‍ പ്പെട്ട 460 ടാബ് ലറ്റുകള്‍ എക്‌സൈസ് സംഘം കണ്ടെടുത്തു. മെഡിക്കല്‍ ഷാപ്പുകളില്‍ നിന്ന് ഡോക്ടറുടെ കുറിപ്പുണ്ടെങ്കില്‍ മാത്രമെ ഇവ ലഭ്യമാക്കാവൂ. പുതുച്ചേരിയില്‍ നിന്നാണ് ഇവര്‍ മരുന്നുകള്‍ വാങ്ങിയതെന്നാണ് പൊലിസിന് നല്‍കിയ വിവരം. സ്ട്രിപ്പ് ഒന്നിന് 40 രൂപ വിലയുള്ള ടാബ്‌ലറ്റ് 140 രൂപയ്ക്കാണ് ഇവര്‍ക്ക് ലഭിക്കുന്നത്. ഒരു സ്ട്രിപ്പിന് 500 രൂപ ഈടാക്കിയാണ് വില്‍പന.
ആവശ്യക്കാര്‍ ഫോണ്‍ മുഖേന വിളിച്ചാണ് വില്‍പന നടത്തി വരുന്നത്.കൊയിലാണ്ടി എക്‌സൈസ് ഇന്‍സ്പക്ടര്‍ക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ മൂന്നാഴ്ചയോളം നടത്തിയ അന്വേഷണത്തിന്റെ ഫലമായാണ് പ്രതികളെ പിടികൂടാനായത്.
കൊയിലാണ്ടിയിലെ കോളജ് വിദ്വാര്‍ഥികളാണ് ലഹരി മരുന്നുകളുടെ പ്രധാന ഉപഭോക്താക്കളെന്നാണ് വിവരം.
വിദ്യാര്‍ഥികളില്‍ നിന്നാണ് ഇവരെ കുറിച്ചുള്ള വിവരം എക്‌സൈസ് സംഘത്തിന് ലഭിച്ചത്. തുടര്‍ന്നുള്ള അന്വേഷണത്തിനിടെയാണ് കൊയിലാണ്ടിയില്‍ വച്ച് പ്രതികള്‍ പിടിയിലാകുന്നത്.
എക്‌സൈസ് ഇന്‍സ്‌പെക്ടര്‍ പി.സജിത്ത്കുമാറിന്റെ നേതൃത്വത്തിലുള്ള സംഘമാമ് പ്രതികളെ പിടിച്ചത്. കോടതിയില്‍ ഹാജരാക്കിയ പ്രതികളെ 14 ദിവസത്തേക്ക് റിമാന്‍ഡ് ചെയ്തു.