തിരുവനന്തപുരം: സ്ത്രീകളെ പൊലിസ് സ്റ്റേഷനിലേക്ക് വിളിച്ചുവരുത്തുന്നതും അവരുടെ മൊഴി രേഖപ്പെടുത്തുന്നതും സംബന്ധിച്ച് നിലവിലുള്ള വ്യവസ്ഥകള്‍ കര്‍ശനമായി പാലിക്കാന്‍ സംസ്ഥാന പൊലിസ് മേധാവി ലോക്‌നാഥ് ബെഹ്‌റ എല്ലാ പൊലിസ് ഉദ്യോഗസ്ഥര്‍ക്കും നിര്‍ദേശം നല്‍കി. നിയമപ്രകാരമുളള വ്യവസ്ഥകള്‍ പാലിക്കാത്ത ഉദ്യോഗസ്ഥര്‍ക്കെതിരേ വകുപ്പുതല നടപടി ആരംഭിക്കുമെന്നും അദ്ദേഹം മുന്നറിയിപ്പു നല്‍കിയിട്ടുണ്ട്.
ഒരു സ്ത്രീയെയും പൊലിസ് സ്റ്റേഷനില്‍ വിളിച്ചുവരുത്താന്‍ പാടില്ല. അവരുടെ മൊഴി രേഖപ്പെടുത്തുന്നത് അവരുടെ താമസസ്ഥലത്തു വച്ചായിരിക്കണം. കേസന്വേഷണവും ചോദ്യം ചെയ്യലും നടത്തുന്ന ഉദ്യോഗസ്ഥര്‍ വ്യക്തികളുടെ നിയമപരവും മാനുഷികവുമായ അവകാശങ്ങളെ മാനിക്കണം. ക്രിമിനല്‍ നടപടി നിയമസംഹിതയിലെ ബന്ധപ്പെട്ട വ്യവസ്ഥകള്‍ ചില ഉദ്യോഗസ്ഥര്‍ ലംഘിക്കുന്നതായി ശ്രദ്ധയില്‍പെട്ടതിനെ തുടര്‍ന്നാണ് പുതിയ നിര്‍ദേശങ്ങള്‍.
ഒരു വനിത നല്‍കുന്ന വിവരങ്ങളും മൊഴിയും സ്വീകരിക്കുന്നതിന് ക്രിമിനല്‍ നടപടി നിയമ സംഹിത പ്രകാരം വ്യക്തമാക്കിയിട്ടുള്ള വ്യവസ്ഥകള്‍ കര്‍ശനമായി പാലിക്കണം. ഇന്ത്യന്‍ ശിക്ഷാനിയമത്തിലെ 326 (എ), 326 (ബി), 354, 354 (എ), 354 (ബി), 354 (സി), 354 (ഡി), 375, 376, 376 (എ), 376 (ബി), 376 (സി), 376 (ഡി), 376 (ഇ), 509 എന്നീ വകുപ്പുകള്‍ പ്രകാരമുള്ള കുറ്റകൃത്യങ്ങള്‍ക്കിരയായ സ്ത്രീ അക്കാര്യം അറിയിക്കുന്നപക്ഷം ഒരു വനിതാ പൊലിസ് ഓഫിസറോ വനിതാ ഓഫിസറോ ആ വിവരം രേഖപ്പെടുത്തേണ്ടതാണ്.
കുറ്റകൃത്യത്തിനു വിധേയരാകുന്ന സ്ത്രീകള്‍ക്കു നിയമസംരക്ഷണവും ആരോഗ്യപ്രവര്‍ത്തകരുടെയോ വനിതാ സംഘടനകളുടെയോ രണ്ടുകൂട്ടരുടെയുമോ സഹായവും ലഭ്യമാക്കണം. കുറ്റകൃത്യത്തിനു വിധേയയാകുന്ന സ്ത്രീ താല്‍കാലികമായോ സ്ഥിരമായോ ശാരീരികമോ മാനസികമോ ആയ വൈകല്യം നേരിടുന്നവരാണെങ്കില്‍ വിവരങ്ങള്‍ രേഖപ്പെടുത്തേണ്ടത് ആ സ്ത്രീയുടെ വീട്ടില്‍ വച്ചോ അവര്‍ക്കു സൗകര്യപ്രദമായ സ്ഥലത്തുവച്ചോ ആയിരിക്കണം. ഒരു സ്‌പെഷ്യല്‍ എജുക്കേറ്ററുടേയോ ഇന്റര്‍പ്രട്ടറുടേയോ മെഡിക്കല്‍ ഓഫിസറുടേയോ സാന്നിധ്യത്തില്‍ വേണം വിവരങ്ങള്‍ രേഖപ്പെടുത്തേണ്ടത്.
ഈ വിവരശേഖരണം കഴിയുന്നതും വീഡിയോയില്‍ പകര്‍ത്തേണ്ടതാണ്. ക്രിമിനല്‍ നടപടി നിയമ സംഹിത 161(3) വകുപ്പു പ്രകാരമുളള മൊഴി ഓഡിയോ, വീഡിയോ സങ്കേതങ്ങള്‍ ഉപയോഗിച്ച് റെക്കോര്‍ഡ് ചെയ്യാവുന്നതാണ്. വനിതകള്‍ നല്‍കുന്ന മൊഴികള്‍ ഒപ്പിട്ടുവാങ്ങേണ്ട ആവശ്യമില്ലെന്നും ഡി.ജി.പി അറിയിച്ചു.