ജിദ്ദ: സഊദിയിലുള്ള വിദേശികൾ അബ്ശിർ സംവിധാനത്തിൽ റജിസ്റ്റർ ചെയ്യണമെന്ന് പാസ്പോർട്ട് വിഭാഗം അറിയിച്ചു. പാസ്പോർട്ട് വിഭാഗത്തിന്റെ ഇലക്ട്രോണിക് സേവനങ്ങൾക്ക് അബ്ശിർ റജിസ്ട്രേഷൻ നിർബന്ധമാണ്. അബ്ശിർ രജിസ്റ്ററിന് വിവിധ ഇടങ്ങളിൽ സംവിധാനങ്ങൾ ഏർപ്പെടുത്തിയിട്ടുണ്ട്.
അബ്ശിർ സംവിധാനത്തിൽ ഇതുവരെ അക്കൗണ്ട് ഇല്ലാത്ത വിദേശികളോടാണ് എത്രയും വേഗം അബ്ശിർ സംവിധാനത്തിൽ റജിസ്റ്റർ ചെയ്യണമെന്ന് സഊദി പാസ്പോർട്ട് അതോറിറ്റി നിർദ്ദേശിച്ചിട്ടുള്ളത്. രജിസ്‌ട്രേഷന്‍ പൂര്‍ത്തീകരിക്കുക വഴി തൊഴിലുടമകള്‍ നല്‍കുന്ന നിരവധി സേവനങ്ങള്‍ ലഭ്യമാക്കാന്‍ സഹായിക്കും. കൂടാതെ പാസ്‌പോര്‍ട്ട്, തൊഴില്‍, ട്രാഫിക് തുടങ്ങി വിവിധ വിഭാഗങ്ങളുടെ സേവനങ്ങള്‍ എളുപ്പത്തില്‍ ലഭ്യമാക്കാന്‍ ഇത് സഹായകരമാകും. വിവിധ ഓഫീസുകളില്‍ നേരിട്ട് പോയി ചെയ്യുന്ന പല കാര്യങ്ങളും ഓണ്‍ലൈന്‍ വഴി ചെയ്യാനാവുന്നതിലൂടെ സമയവും പരിശ്രമവും ലാഭിക്കാനാകുമെന്നും ജനറല്‍ ഡയരക്ടറേറ്റ് ഓഫ് പാസ്‌പോര്‍ട്ട് അറിയിച്ചു.
ആഭ്യന്തരമന്ത്രാലയത്തിന്‍റെ മുഴുവന്‍ സേവനങ്ങളും ഓണ്‍ലൈനാക്കുന്നതിന്‍റെ ഭാഗമായി അടുത്തിടെ നിരവധി പുതിയ സേവനങ്ങള്‍ അബ്ഷിറില്‍ ഉള്‍പ്പെടുത്തിയിരുന്നു. 11 ദശലക്ഷത്തിലധികം പേര്‍ അബ്ഷിറില്‍ ഇതിനോടകം തന്നെ രജിസ്റ്റര്‍ ചെയ്തിട്ടുണ്ട്. വ്യക്തികളുടെയും ആശ്രിതരുടേയും സ്വകാര്യ സ്ഥാപനങ്ങളുടേയും ജീവനക്കാരുടേയും സേവനങ്ങള്‍ക്ക് പുറമെ സര്‍ക്കാര്‍ സ്ഥാപനങ്ങള്‍ക്കുള്ള സേവനങ്ങളും അബ്ഷറില്‍ ലഭ്യമാണ്.