ബെയ്ജിങ്: ഇന്ത്യയില്‍ നിന്നുള്ള ശാസ്ത്ര, സാങ്കേതിക വിദഗ്ധരെ ഒഴിവാക്കിയത് വലിയ മണ്ടത്തരമായെന്ന് ചൈനീസ് മാധ്യമം. ഗ്ലോബല്‍ ടൈംസാണ് ഇന്ത്യയില്‍ നിന്നുള്ള ഹൈടെക് പ്രതിഭകളെ ഉപയോഗപ്പെടുത്തേണ്ടതായിരുന്നുവെന്ന് അഭിപ്രായപ്പെട്ടത്.
ഇന്ത്യന്‍ പ്രതിഭകളെ അവഗണിച്ച് പകരം അമേരിക്കയില്‍ നിന്നും യൂറോപ്പില്‍ നിന്നുമുള്ളവര്‍ക്ക് അമിത പ്രാധാന്യവും സ്വീകാര്യതയും ചൈന നല്‍കിയെന്നും പത്രം കുറ്റപ്പെടുത്തുന്നു. ശാസ്ത്ര, സാങ്കേതിക രംഗത്ത് ഇന്ത്യക്കാരെ അവഗണിച്ചത് ചൈനയുടെ ഉയര്‍ച്ചയെ ബാധിക്കുമെന്നാണ് ഔദ്യോഗിക മാധ്യമം തുറന്നു പറയുന്നത്. ഇന്ത്യയെ ഇതുവരെ വിമര്‍ശിച്ച് ലേഖനമെഴുതുന്ന പാരമ്പര്യമാണ് ഗ്ലോബല്‍ ടൈംസിനുള്ളത്.
ഇന്ത്യന്‍ പ്രതിഭകളെ ചൈനീസ് മാധ്യമം അംഗീകരിക്കുന്നതും അപൂര്‍വമാണ്. ഈയിടെ ഇന്ത്യ നടത്തിയ ബഹിരാകാശ നേട്ടത്തെ ചൈനീസ് മാധ്യമങ്ങള്‍ അഭിനന്ദിച്ചെങ്കിലും വിമര്‍ശനവും ഉന്നയിച്ചിരുന്നു. ഇന്ത്യയുടെ നേട്ടം ചൈനയുടെ ശേഷിയെ മറികടക്കാന്‍ കഴിയുന്നതല്ലെന്നായിരുന്നു വിമര്‍ശനം.
രാജ്യത്തിന്റെ സാങ്കേതിക വിദ്യയില്‍ രാജ്യത്തു നിന്നുള്ള വിദഗ്ധരെ മാത്രം മതിയാകില്ലെന്നാണ് പത്രം പറയുന്നത്. തൊഴിലിടങ്ങളില്‍ ഇന്ത്യന്‍ എന്‍ജിനീയറേക്കാള്‍ കൂടുതല്‍ ശമ്പളം ചൈനീസ് തൊഴിലാളിക്ക് നല്‍കുന്ന കാര്യവും ഗ്ലോബല്‍ ടൈംസ് വിമര്‍ശിക്കുന്നു.