ചാലക്കുടി : പുതുവത്സര രാത്രിയില്‍ മദ്യപിച്ച് വാഹനമോടിച്ചതിനെ തുടര്‍ന്നുണ്ടായ അപകടത്തില്‍ വിദ്യാര്‍ഥി മരിച്ച സംഭവത്തില്‍ പ്രതി റിമാന്‍ഡില്‍. ഈ കേസില്‍ കൊരട്ടി പോലിസ് സബ് ഇന്‍സ്‌പെക്ടര്‍ ജയേഷ് ബാലന്‍ അറസ്റ്റ് ചെയ്ത അന്നമനട കുരിയക്കാട്ടില്‍ അഷിബിന്‍(28)നെയാണ് കോടതി റിമാന്‍ഡ് ചെയ്തത്. പുതുവത്സര ആഘോഷം കഴിഞ്ഞ രാത്രി വീട്ടിലേക്ക് പോവുകയായിരുന്ന വാളൂര്‍ വെള്ളാട്ടുപറമ്പില്‍ ജോസഫിന്റെ മകന്‍ ആല്‍ഫിനാണ് മരിച്ചത്. ആല്‍ഫിന്റെ സുഹൃത്തും എടത്തിപറമ്പില്‍ നെല്‍സന്റെ മകനുമായ സിബിന് അപകടത്തില്‍ ഗുരുതരമായി പരുക്കേല്‍ക്കുകയും ചെയ്തിരുന്നു. സിബിന്‍ ഇപ്പോഴും സ്വകാര്യ ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലാണ്. വാളൂരില്‍ വച്ച് സൈക്കിളുമായി വരുകയായിരുന്ന ഇവരുടെ മേല്‍ മദ്യപിച്ചെത്തിയ പ്രതി ഓടിച്ചിരുന്ന ബൊലേറോ ജീപ്പ് നിയന്ത്രണം വിട്ട് ഇടിക്കുകയായിരുന്നു. സംഭവസ്ഥലത്ത് വച്ച് തന്നെ ആല്‍ഫിന്‍ മരിച്ചിരുന്നു. വിദ്യാര്‍ഥികളെ ഇടിച്ച് തെറിപ്പിച്ച ജീപ്പ് കുറച്ച് ദൂരം കൂടി ഓടി റോഡരികിലെ ഇലക്ട്രിക് പോസ്റ്റിലിടിച്ചാണ് നിന്നത്. ഇടിയുടെ ആഘാതത്തില്‍ പോസ്റ്റിന്റെ ഒരുഭാഗം ജീപ്പിന്റെ മുകളിലേക്ക് വീണ് പ്രതിക്ക് സാരമായ പരുക്കേല്‍ക്കുകയും ചെയ്തിരുന്നു. തുടര്‍ന്ന് ചികിത്സയിലായിരുന്ന പ്രതി രക്ഷപ്പെടാതിരിക്കാന്‍ ആശുപത്രിയില്‍ പൊലിസ് കാവലും ഏര്‍പ്പെടുത്തിയിരുന്നു. കഴിഞ്ഞ ദിവസം ആശുപത്രിയില്‍ നിന്നും വിട്ടതോടെ പൊലിസ് അറസ്റ്റ് ചെയ്ത് കോടതിയില്‍ ഹാജരാക്കുകയായിരുന്നു. അന്വേഷണ സംഘത്തില്‍ എ.എസ്.ഐ സജി വര്‍ഗീസ്, ര്‍ സി.പി.ഒ:മാരായ ഷിബു സി.പി, ബിജു എം.ബി, അജിത് സി.ജി, രഞ്ജിത്ത് വി.പി, ജിബി, എ.വി.റെജി എന്നിവരും ഉണ്ടായിരുന്നു.