കണ്ണൂര്‍: ആര്‍ദ്രം പദ്ധതിയിലൂടെ ആശുപത്രികള്‍ രോഗീ സൗഹൃദമാക്കുമെന്ന് മന്ത്രി കെ.കെ ശൈലജ. സംസ്ഥാന സര്‍ക്കാരിന്റെ ആര്‍ദ്രം പദ്ധതിയുടെ ജില്ലാതല ഉദ്ഘാടനം പ്ലാനിങ് ഓഫിസ് കോണ്‍ഫറന്‍സ് ഹാളില്‍ നിര്‍വഹിക്കുകയായിരുന്നു മന്ത്രി. മെച്ചപ്പെട്ട ചികിത്സാ സൗകര്യം, പ്രതിരോധ നിര്‍ദേശങ്ങള്‍ തുടങ്ങിയവ ലഭ്യമാക്കി ആശുപത്രികള്‍ രോഗീസൗഹൃദമാക്കുകയാണ് ലക്ഷ്യം.
ജില്ല-താലൂക്ക് ആശുപത്രികളില്‍ സൂപ്പര്‍ സ്‌പെഷാലിറ്റി സൗകര്യങ്ങള്‍ ഒരുക്കുന്നതോടൊപ്പം പ്രാഥമിക ചികിത്സാ കേന്ദ്രങ്ങളെ കുടുംബ ചികിത്സാ കേന്ദ്രങ്ങളാക്കുക വഴി ഗ്രാമീണ ആരോഗ്യമേഖലയില്‍ വിപ്ലവകരമായ മാറ്റങ്ങള്‍ കൊണ്ടുവരാന്‍ സാധിക്കും. രോഗികള്‍ക്ക് നേരിട്ട് പേര് രജിസ്റ്റര്‍ ചെയ്ത് ഡോക്ടറുടെ സേവനം എളുപ്പത്തില്‍ ലഭ്യമാക്കാനാവുന്ന തരത്തില്‍ ഒ.പി ബ്ലോക്ക് നവീകരണം ആശുപത്രികളില്‍ നടപ്പാക്കും. ഇതിനായി ഡോക്ടര്‍മാര്‍ക്കും ആശുപത്രി ജീവനക്കാര്‍ക്കും പരിശീലനം നല്‍കും. ജില്ലയെ കാന്‍സര്‍ മുക്തമാക്കാനുള്ള പദ്ധതിയും നടപ്പാക്കാന്‍ ലക്ഷ്യമിടുന്നതായും മന്ത്രി അറിയിച്ചു.
ജില്ലാ പഞ്ചായത്ത് പ്രസിഡന്റ് കെ.വി സുമേഷ് അധ്യക്ഷനായി. ഡി.പി.സി അംഗം കെ.വി ഗോവിന്ദന്‍, മലബാര്‍ കാന്‍സര്‍ സെന്റര്‍ ഡയരക്ടര്‍ ഡോ. സതീഷ് ബാലസുബ്രഹ്മണ്യം എന്നിവര്‍ വിഷയാവതരണം നടത്തി. ജില്ലാ മെഡിക്കല്‍ ഓഫിസര്‍ ഡോ. കെ നാരായണ നായിക്, ഡെപ്യൂട്ടി ഡി.എം.ഒ ഡോ.കെ.എം ഷാജ് സംസാരിച്ചു.