കരുവഞ്ചാല്‍: ഫാസിസം നിറഞ്ഞാടുന്ന ഇക്കാലത്ത് രാജ്യത്തിന്റെ മതേതര പാരമ്പര്യവും മതമൈത്രിയും നിലനിര്‍ത്താന്‍ സര്‍ഗവാസനകളെ ഉപയോഗപ്പെടുത്തണമെന്ന് രയറോം സെന്റ് സെബാസ്റ്റ്യന്‍സ് ദേവാലയ വികാരി ഫാ. ജോസഫ് കാരിക്കാട്ടില്‍.
കരുവഞ്ചാല്‍ റെയ്ഞ്ച് ഇസ്‌ലാമിക കലാമേളയോടനുബന്ധിച്ച് നടന്ന സാംസ്‌കാരിക സൗഹാര്‍ദ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സഹിഷ്ണുതയും സൗഹാര്‍ദവും കളിയാടുമ്പോഴേ രാഷ്ട്രത്തിനു നിലനില്‍പുള്ളൂ. ഭീഷണമായ വര്‍ഗീയതയെ ഇല്ലായ്മ ചെയ്യാന്‍ സര്‍വമത വിശ്വാസികളും മുന്നോട്ടുവരണമെന്നും ഫാ. ജോസഫ് പറഞ്ഞു.
ഹാരിസ് ദാരിമി അധ്യക്ഷനായി. അബ്ദുറഹീം ദാരിമി പെടേന മുഖ്യപ്രഭാഷണം നടത്തി. ഷിബി സനീഷ്, ഇസ്മാഈല്‍ ഫൈസി, റഷീദ് ദാരിമി തടിക്കടവ്, ഷറഫുദീന്‍ ദാരിമി സംസാരിച്ചു. ആര്‍ട്ട് ഗാലറി ഉദ്ഘാടനം മാധ്യമപ്രവര്‍ത്തകന്‍ ശ്രീനി ആലക്കോട് നിര്‍വഹിച്ചു.