നാദാപുരം(കോഴിക്കോട്): കല്ലാച്ചി മാര്‍ക്കറ്റ് റോഡിലെ റിന്‍സി ജ്വല്ലറിയില്‍ കവര്‍ച്ച നടത്തിയ മൂന്നംഗസംഘം പൊലിസ് പിടിയില്‍. ആന്ധ്ര തിരുവള്ളൂര്‍ പാക്കം ഗ്രാമത്തിലെ അഞ്ചാംപുലി (52), തമിഴ്‌നാട് വിഴുപ്പുരം ജില്ലയില്‍ കോട്ടമേട്ടിലെ രാജ (32), തമിഴ്‌നാട് മധുര പുത്തൂറിലേ സൂര്യ (22) എന്നിവരെയാണ് നാദാപുരം ഡിവൈ. എസ്.പിയുടെ നേതൃത്വത്തിലുള്ള സംഘം പിടികൂടിയത്. കൂട്ടുപ്രതികളായ മൂന്നുപേരെ ഇനിയും കിട്ടാനുണ്ട്. ഇവര്‍ക്കായുള്ള അന്വേക്ഷണം നടക്കുകയാണെന്ന് റൂറല്‍ എസ്.പി അറിയിച്ചു. അഞ്ചാംപുലി വിവിധ മോഷണക്കേസുകളില്‍ പ്രതിയാണ്. ഇയാള്‍ 2008ല്‍ തലശേരി പൊന്ന്യം സര്‍വിസ് സഹകരണ ബാങ്കില്‍ കവര്‍ച്ച നടത്തിയ കേസിലെ മുഖ്യ പ്രതിയായിരുന്നു.

ലോക്കറുകള്‍ പൊളിക്കുന്നതില്‍ വിദഗ്ധനായ രാജ ചെന്നൈയില്‍ ഡ്രൈവറായി ജോലി ചെയ്തുവരികയായിരുന്നു. കൊയിലാണ്ടി, കോഴിക്കോട്, തിക്കോടി, നന്തി കണ്ണൂര്‍ എന്നിവിടങ്ങളിലും ഇവര്‍ മോഷണം നടത്തിയിട്ടുണ്ട്. ഇവര്‍ കഴിഞ്ഞ നവംബറില്‍ തൃശൂര്‍ ഒല്ലൂരിലെ ആത്മിക, അന്ന ജ്വല്ലറികളിലും മലപ്പുറം പുളിക്കലിലെ എസ്.എം ജ്വല്ലറിയിലും കവര്‍ച്ച നടത്തിയതായി പൊലിസിനോട് സമ്മതിച്ചു. ഡിസംബര്‍ നാലിന് പുലര്‍ച്ചെയാണ് റിന്‍സി ജ്വല്ലറിയില്‍ ഇവര്‍ കവര്‍ച്ച നടത്തുന്നത്.