ജലീല്‍ അരൂക്കുറ്റി#

കൊച്ചി: പ്രഥമ പ്രോ വോളിബോള്‍ ലീഗിന്റെ ആദ്യപതിപ്പിലെ മത്സരങ്ങള്‍ കൊച്ചിയില്‍. ഫെബ്രുവരി രണ്ട് മുതല്‍ 13 വരെയായിരിക്കും കൊച്ചിയിലെ മത്സരങ്ങള്‍. കഴിഞ്ഞ ദിവസം ചെന്നൈയില്‍ സമാപിച്ച 67-ാമത് ദേശീയ ചാംപ്യന്‍ഷിപ്പിലാണ് പ്രോ വോളിബോള്‍ ലീഗിന്റെ ആദ്യപതിപ്പിനുള്ള ഷെഡ്യൂള്‍ പ്രഖ്യാപിച്ചത്. ലീഗിലെ ആറ് ടീമുകളും കൊച്ചിയില്‍ കളിക്കുമെന്നതും കേരളത്തിലെ രണ്ട് ടീമും കൊച്ചിയില്‍ തന്നെ ലീഗ് മാച്ചുകള്‍ പൂര്‍ത്തീകരിക്കുമെന്നതും പ്രത്യേകതയാണ്. കൊച്ചിയിലെ രാജീവ് ഗാന്ധി സ്റ്റേഡിയവും, ചെന്നൈയിലെ ജവഹര്‍ലാല്‍ നെഹ്‌റു സ്റ്റേഡിയവുമാണ് ലീഗിന്റെ ഉദ്ഘാടന സീസണിലെ മത്സരങ്ങള്‍ക്കുള്ള വേദികളായി തെരഞ്ഞെടുത്തിരിക്കുന്നത്. ആദ്യ സീസണിലുള്ള മൊത്തം 18 മത്സരങ്ങളില്‍ ഓരോ ടീമും ഒരു റൗണ്ട് റോബിന്‍ ഫോര്‍മാറ്റില്‍ പരസ്പരം ഏറ്റുമുട്ടുന്നതാണ്. 18 മത്സരങ്ങള്‍ കൊച്ചി, ചെന്നൈ എന്നീ നഗരങ്ങളിലായി നടക്കുന്ന രണ്ട് പാദങ്ങളായി വിഭജിച്ചിരിക്കയാണ്. ആദ്യത്തെ പന്ത്രണ്ട് മത്സരങ്ങള്‍ കൊച്ചിയിലും രണ്ട് സെമി ഫൈനലുകളും ഫൈനലും ഉള്‍പ്പെടെയുള്ള ശേഷിക്കുന്ന ആറ് മത്സരങ്ങള്‍ ചെന്നൈയിലുമാണ് നടക്കുക. ബേസ്ലൈന്‍ വെഞ്ച്വേഴ്‌സിന്റെയും വോളിബോള്‍ ഫെഡറേഷന്‍ ഓഫ് ഇന്ത്യയുടെയും ഒരു സംരംഭമായ ലീഗ് കൊച്ചി ബ്ലു സ്‌പൈക്കേഴ്‌സ് യു മുംബ വോളിയുമായി ഏറ്റുമുട്ടുന്ന മത്സരത്തോടെയാണ് ഫെബ്രുവരി രണ്ടിന് തുടക്കം കുറിക്കുന്നത്. 22 ന് ചെന്നൈയിലാണ് ഫൈനല്‍ പോരാട്ടം. ലീഗില്‍ കിരീടത്തിനു വേണ്ടി ആറ് ഫ്രാഞ്ചൈസികളാണ് മാറ്റുരയ്ക്കുക. ടിക്കറ്റുകള്‍ക്ക് 300 രൂപയാണ് വിലയിട്ടിരിക്കുന്നത്. സീസണ്‍ ടിക്കറ്റുകള്‍ 30 ശതമാനം കിഴിവില്‍ ലഭ്യമാകുന്നതാണ്. ഏര്‍ളി ബേഡ് ടിക്കറ്റുകള്‍ 20 ശതമാനം കിഴിവില്‍ ലഭിക്കുന്നതാണ്. എല്ലാ ടിക്കറ്റുകളും, ടൂര്‍ണമെന്റിന്റെ ഔദ്യോഗിക ടിക്കറ്റിങ് പാര്‍ട്ണര്‍മാരായ പേ.ടി.എമ്മിലും ഇന്‍സൈഡര്‍.ഇനിലും ഇന്നു മുതല്‍ ലഭ്യമാകുന്നതാണ്. സോണി സിക്‌സ്, സോണി ടെന്‍ 3, സോണി ലൈവ് എന്നിവയില്‍ തത്സമയം സംപ്രേഷണം ചെയ്യും.