എ. മുഹമ്മദ് നൗഫല്‍

കൊല്ലം: ദേശീയ സീനിയര്‍ വനിതാ ഹോക്കി ചാംപ്യന്‍ഷിപ്പില്‍ ബി ഡിവിഷനിലെ ഫൈനല്‍ ഇന്ന് നടക്കും. കരുത്തനായ എസ്.എസ്.ബിയും (സശസ്ത്രസീമാബല്‍) എസ്.പി.എസ്.ബിയും (സ്റ്റീല്‍പ്ലാന്റ് സ്‌പോര്‍ട്‌സ് ബോര്‍ഡ്) തമ്മിലാണ് ഫൈനല്‍. ഇന്ന് വൈകിട്ട് നാലിനാണ് കിരീട പോരാട്ടം. ഇന്നലെ നടന്ന സെമിഫൈനലില്‍ എസ്.എസ്.ബി പ്രീതി സിമാറും മനീഷ റാത്തിയും ഹാട്രിക്ക് ഗോളോടെ എതിരാളികളായ യൂക്കോ ബാങ്കിനെ പരാജയപ്പെടുത്തി. ബിജേത ലോങ്ജം ദേവി, അന്‍ജിക എന്നിവരും എസ്.എസ്.ബിയ്ക്ക് വേണ്ടി ഗോളുകള്‍ നേടി. യൂക്കോബാങ്കിന്റെ ആശ്വാസഗോള്‍ പൂജയുടെ വകയായിരുന്നു. 

രണ്ടാം സെമിയില്‍ 6 - 0 ന് ബംഗളൂരുവിനെ തകര്‍ത്തെറിഞ്ഞാണ് എസ്.പി.എസ്.ബി ഫൈനലിലെത്തിയത്. ധവാല്‍ മനീഷയും സവിതയും എസ്.പി.എസ്.ബി യ്ക്ക് വേണ്ടി ഇരട്ടഗോളുകള്‍ നേടി. ക്യാപ്റ്റന്‍ മംമ്ത ഭട്ടും ദേവികയും ഓരോ ഗോളുകള്‍ വീതം നേടി. 

ഇന്ന് വൈകിട്ട് മൂന്നിന് മൂന്നാം സ്ഥാനത്തിന് വേണ്ടിയുള്ള മത്സരത്തില്‍ യൂക്കോ ബാങ്ക് ഹോക്കി അക്കാദമിയും ബംഗളുരുവും തമ്മില്‍ ഏറ്റുമുട്ടും.