അറക്കുളം: ബിപിഎല്‍ റേഷന്‍ കാര്‍ഡിനുള്ള ലിസ്റ്റില്‍ അനര്‍ഹരെ ഉള്‍പ്പെടുത്തിയതില്‍ പ്രതിഷേധിച്ച് നാട്ടുകാര്‍ പഞ്ചായത്താഫീസിനു മുന്നില്‍ സമരം നടത്തി.
അറക്കുളം പഞ്ചായത്തില്‍ ബി.പി.എല്‍ റേഷന്‍ കാര്‍ഡ് പുനസംഘടിപ്പിച്ചപ്പോള്‍ ഇന്‍കം ടാക്‌സ് കൊടുക്കുന്നവരും വാര്‍ക്ക കെട്ടിടമുള്ളവരും രണ്ടില്‍ കൂടുതല്‍ വാഹനമുള്ളവരും ഏക്കര്‍ കണക്കിനു സ്ഥലമുള്ളവരും ലിസ്റ്റില്‍ കടന്നു കൂടുകയും സാധാരണക്കാര്‍ എപിഎല്‍ ലിസ്റ്റില്‍ വരികയും ചെയ്തതാണ് പ്രതിഷേധത്തിനിടയാക്കിയത്. റേഷന്‍ കടക്കാര്‍ നല്‍കിയ ലിസ്റ്റിനു പുറമെ പഞ്ചായത്തില്‍ നിന്നും തയ്യാറാക്കിയ ലിസ്റ്റിലാണ് അനര്‍ഹരായവര്‍ കൂടുതല്‍ ഉള്‍പ്പെട്ടിട്ടുള്ളത്. പഞ്ചായത്തംഗങ്ങള്‍ തങ്ങള്‍ക്കു വേണ്ടപ്പെട്ടവരെ ലിസ്റ്റില്‍ ഉള്‍പെടുത്തുകയായിരുന്നുവെന്ന് സമരക്കാര്‍ ആരോപിച്ചു.