ന്യൂഡല്‍ഹി: ആനകളെ സര്‍ക്കസിനുപയോഗിക്കുന്നത് നിരോധിക്കാനൊരുങ്ങി കേന്ദ്ര മൃഗശാല വകുപ്പ്. ഇക്കാര്യമുന്നയിച്ച് സംസ്ഥാനങ്ങളിലെ വന്യജീവി വകുപ്പ് അധികാരികള്‍ക്ക് കേന്ദ്രം കത്തയച്ചിട്ടുണ്ട്. സംസ്ഥാനങ്ങളുടെ കീഴിലുള്ള ആനകളുടെ പുനരധിവാസം നടത്തി സംരക്ഷിക്കണമെന്നും കത്തിലുണ്ട്. ഇക്കാര്യമുന്നയിച്ച് കേന്ദ്ര പരിസ്ഥിതി മന്ത്രാലയത്തിനും മൃഗശാല അധികൃതര്‍ കത്തയച്ചിട്ടുണ്ട്.

1972ലെ വന്യജീവി സംരക്ഷണ നിയമപ്രകാരം ആനകളെ സര്‍ക്കസുകളില്‍ ഉപയോഗിക്കുന്നത് നിയമലംഘനമാണെന്നാണ് കേന്ദ്ര മൃഗശാല അതോറിറ്റി വ്യക്തമാക്കിയത്. സര്‍ക്കസില്‍ സ്വന്തം നിലയില്‍ വിലകൊടുത്ത് വാങ്ങിയ ആനകളെ ഉപയോഗിക്കുന്നതിന് ലൈസന്‍സ് നിര്‍ബന്ധമാണെന്നും അധികൃതര്‍ വ്യക്തമാക്കി. മൃഗങ്ങളോടുള്ള ക്രൂരത തടയുന്നതിന്റെ ഭാഗമായാണ് അധികൃതരുടെ പുതിയ നീക്കം.