ദുബൈ: യു.എ.ഇ പൊതുമാപ്പ് കാലാവധി അവസാനിച്ചതോടെ അനധികൃത താമസക്കാരായ ആയിരക്കണക്കിന് ഇന്ത്യക്കാർ ഈയവസരം ഉപയോഗപ്പെടുത്തിയതായി വിലയിരുത്തൽ. ദുബൈ കെ.എം.സി.സി പൊതുമാപ്പ് കാലയളവിൽ നടത്തിയ പ്രവർത്തനങ്ങളെ ഇന്ത്യൻ കോൺസുലേറ്റ് പ്രത്യേകം പ്രശംസിച്ചു. 

ദുബൈ കെ.എം.സി.സി പ്രസിഡണ്ട് ഡോ. അൻവർ അമീന്റെ നേതൃത്വത്തിൽ കോൺസുലേറ്റിലെത്തിയ കെ.എം.സി.സി പ്രതിനിധികളെ കോൺസുൽ ജനറൽ ഇൻ ചാർജ് ബബിത കുമാർ പ്രത്യേകം അഭിനന്ദിച്ചു. 

ഭാരവാഹികളായ കെ.പി.എ സലാം, ഇബ്രാഹിം മുറിച്ചാണ്ടി, എ.സി ഇസ്മായിൽ, അഡ്വ. ഇബ്രാഹിം ഖലീൽ, വനിതാ കെ.എം.സി.സി ഭാരവാഹികളായ നജ്മ സാജിദ്, റാബിയ സത്താർ, റിയാന സലാം, സെയ്ത്തൂൻ തുടങ്ങിയവർ കെ.എം.സി.സി പ്രതിനിധി സംഘത്തിലുണ്ടായിരുന്നു. കോൺസുലേറ്റ് ഉദ്യോഗസ്ഥരുമായി കെ.എം.സി.സി നേതാക്കൾ കൂടിക്കാഴ്ച നടത്തി. ദുബൈ കെഎംസിസി വളണ്ടിയർ വിഭാഗവും വനിതാ വിംഗും പൊതുമാപ്പ് പ്രഖ്യാപിച്ച ആദ്യ ദിവസം മുതൽ സേവന സന്നദ്ധരായി കോൺസുലേറ്റുമായി സഹകരിച്ച് പ്രവർത്തിച്ചു വരികയായിരുന്നു. നൂറു കണക്കിനാളുകൾക്ക് രേഖകളുടെ സഹായങ്ങൾ ചെയ്തു നൽകിയും വിമാന ടിക്കറ്റുകൾ ലഭ്യമാക്കിയും ദുബൈ കെ.എം.സി.സി മാതൃകാ പ്രവർത്തനമാണ് നടത്തിയത്. പാർക്കുകളിലും മറ്റും കഴിഞ്ഞിരുന്ന രേഖകളൊന്നുമില്ലാത്ത നിരവധിയാളുകളെ കണ്ടെത്തി പൊതുമാപ്പ് ആനുകൂല്യം ഉപയോഗപ്പെടുത്തി നാട്ടിലേക്ക് കയറ്റിയയക്കാൻ സാധിച്ചു. പൊതുമാപ്പ് ആനുകൂല്യം ഉപയോഗപ്പെടുത്താൻ പ്രേരിപ്പിക്കുന്നതിന് ബോധവൽക്കരണ കൺവെൻഷൻ, സോഷ്യൽ മീഡിയ പ്രചാരണം, ഫീൽഡ് കാമ്പയിൻ എന്നിവ കെ.എം.സി.സി ആഭിമുഖ്യത്തിൽ നടത്തിയിരുന്നു.