ലണ്ടൻ: പുതുവർഷത്തിലെ ആദ്യ ഇംഗ്ലീഷ് പ്രീമിയർ ലീഗ് മത്സരത്തിൽ ആഴ്സണലിന് ജയം. ബ്രെന്റ്ഫോർഡിനെ ഒന്നിനെതിരെ മൂന്ന് ഗോളുകൾക്ക് പരാജയപ്പെടുത്തിയാണ് പീരങ്കിപട 2025ലെ ആദ്യ വിജയം സ്വന്തമാക്കിയത്. മത്സരം തുടങ്ങി 13ാം മിനിറ്റിൽ തന്നെ ബ്രയാൻ എംബ്യുമോയിലൂടെ ബ്രെന്റ്ഫോർട്ടാണ് ആദ്യം ലീഡ് നേടിയത്. എന്നാൽ പിന്നീടുള്ള നിമിഷങ്ങളിൽ ആഴ്സണൽ ശക്തമായി തിരിച്ചടിക്കുകയായിരുന്നു. 

ഗബ്രിയേൽ ജീസസിസിലൂടെ ഗണ്ണേഴ്‌സ്‌ 29ാം മിനിറ്റിൽ ഗോൾ തിരിച്ചടിച്ചു. ഒടുവിൽ ആദ്യ പകുതിയിൽ ഇരുടീമുകളും സമനിലയിൽ പിരിയുകയായിരുന്നു. രണ്ടാം പകുതിയിൽ മൈക്കൽ മെറിനോ(50), ഗബ്രിയേൽ മാർട്ടിനെല്ലി(53) എന്നിവരുടെ ഗോളിൽ ആഴ്സണൽ ആവേശകരമായ വിജയം സ്വന്തമാക്കുകയായിരുന്നു. 

വിജയത്തോടെ ഇംഗ്ലീഷ് പ്രീമിയർ ലീഗിൽ നോട്ടിംഗ്ഹാം ഫോറസ്റ്റിനെ മറികടന്നുകൊണ്ട് രണ്ടാം സ്ഥാനത്തെത്താനും ആഴ്സണലിന് സാധിച്ചു. നിലവിൽ 19 മത്സരങ്ങളിൽ നിന്നും 11 വിജയവും ആറ് സമനിലയും ഒരു തോൽവിയും അടക്കം 39 പോയിന്റാണ് ആഴ്സണലിന് ഉള്ളത്. 45 പോയിന്റുമായി ലിവർപൂളാണ് ഒന്നാം സ്ഥാനത്തുള്ളത്. 

ഇംഗ്ലീഷ് പ്രീമിയർ ലീഗിൽ ജനുവരി നാലിന് ബ്രൈറ്റണിനെതിരെയാണ് ആഴ്സണലിന്റെ അടുത്ത മത്സരം. ബ്രൈറ്റണിന്റെ തട്ടകമായ ഫാൽമർ സ്റ്റേഡിയത്തിലാണ് മത്സരം നടക്കുക.