നീലേശ്വരം(കാസർകോട്): പട്ടയം ലഭിക്കാതെ കൈവശാവകാശ ഭൂമിയിൽ വർഷങ്ങളായി താമസിക്കുന്നവർക്ക് കൃഷിക്കും മൃഗസംരക്ഷണത്തിനും നിർമിതികൾക്കുമായി ധനസഹായം  നൽകാൻ സർക്കാർ ഉത്തരവ്. പൗൾട്രി ഫാം, കാലിത്തൊഴുത്ത് തുടങ്ങി കൃഷി ആവശ്യങ്ങൾക്ക് താൽക്കാലിക സ്വഭാവത്തിലുള്ളതോ എടുത്തു മാറ്റാവുന്നതോ ആയ നിർമാണങ്ങൾ നടത്താനാണ് സബ്സിഡിയോടുകൂടി ധനസഹായം നൽകാൻ സർക്കാർ ഉത്തരവിട്ടത്. 

ഇത് സംബന്ധിച്ച ഉത്തരവുകൾ തദ്ദേശസ്ഥാപനങ്ങളുടെ പ്രസിഡൻ്റ് ,സെക്രട്ടറിമാർക്കും ഈ മേഖലയുമായി ബന്ധപ്പെട്ട വകുപ്പ് മേധാവികൾക്കും അയച്ചിട്ടുണ്ട്. പൊതു വിഭാഗത്തിന് 50 ശതമാനവും പട്ടികജാതി വിഭാഗത്തിന് 50 ശതമാനവും പട്ടികവർഗ വിഭാഗത്തിന് 100 ശതമാനവും സബ്സിഡി നിരക്കിൽ ധനസഹായം നൽകാനാണ് നിർദേശം. പരമാവധി മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിലൂടെ വിഹിതം ഉപയോഗിക്കണം.

അങ്ങനെ കഴിയില്ലെങ്കിൽ മാത്രം മറ്റു വിഹിതം ഉപയോഗിക്കാനും സർക്കാർ അനുമതി നൽകിയിട്ടുണ്ട്. ഭൂമിയുടെ ഉടമസ്ഥത വ്യക്തമാക്കുന്ന മറ്റു രേഖകളുടെ അടിസ്ഥാനത്തിൽ വീട് നിർമിക്കാനുള്ള ധനസഹായം തുടരണം. വ്യക്തിഗത പ്രോജക്ടുകൾ നഗരസഭകൾക്കോ ഗ്രാമപഞ്ചായത്തുകൾക്കോ ഏറ്റെടുക്കാം. സ്വന്തമായി ഭൂമിയില്ലാതെ പുറമ്പോക്കു ഭൂമിയിൽ വീടുവച്ച് താമസിക്കുന്ന സാധാരണക്കാർക്ക് ആശ്വാസമാകുന്നതാണ് സർക്കാർ ഉത്തരവ്.