കരുനാഗപ്പള്ളി: തെരുവുനായ്ക്കള്‍ കൂട്ടമായി ആക്രമിക്കാന്‍ ഓടിച്ചതിനെ തുടര്‍ന്ന് ഭയന്നോടിയ വീട്ടമ്മ റോഡില്‍ തലയിടിച്ചു വീണു മരിച്ചു.

പന്മന മാവേലി ഐഷാ മന്‍സിലില്‍ സജീവിന്റെ (ബാബു) ഭാര്യ അമീന (24) ആണ് മരിച്ചത്. വൈകിട്ട് മൂന്നോടെ ആയിരുന്നു സംഭവം. വീട്ടില്‍ നിന്നു പാലു വാങ്ങാന്‍ സമീപത്തെ സൊസൈറ്റിയിലേക്ക് പോകുന്നതിനായി വീടിനു സമീപത്തെ പുരയിടത്തിലൂടെ പോകുമ്പോള്‍ കൂട്ടത്തോടെയെത്തിയ തെരുവുനായ്ക്കള്‍ ഓടിക്കുകയായിരുന്നു.

ഭയന്നോടിയ അമീന റോഡില്‍ തലയിടിച്ച് വീഴുകയായിരുന്നു. വീഴ്ചയില്‍ തലയ്ക്ക് ഗുരുതരമായി പരിക്കേറ്റു. വീണതിനെ തുടര്‍ന്ന് നായ്ക്കള്‍ ഓടി മാറി.

അമീന ധരിച്ചിരുന്ന ഷാള്‍ നായ്ക്കള്‍ കടിച്ചെടുത്തു. ബഹളം കേട്ട് ഓടിയെത്തിയ സമീപവാസികള്‍ ഇവരെ കരുനാഗപ്പള്ളി താലൂക്കാശുപത്രിയിലെത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.

ഐഷ (6), ആദില്‍ (4 മാസം) എന്നിവര്‍ മക്കളാണ്. മൃതദേഹം താലൂക്ക് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. പോസ്റ്റ് മോര്‍ട്ടത്തിന് ശേഷം മൃതദേഹം ബന്ധുക്കള്‍ക്ക് വിട്ടുകൊടുക്കും. ചവറ ജുമുഅ മസ്ജിദില്‍ ഖബറടക്കും.