നെടുമങ്ങാട് : ബൈക്കില്‍ സഞ്ചരിക്കുകയായിരുന്ന യുവാവിനെ കാറിലെത്തിയ സംഘം ബോംബ് എറിഞ്ഞു വീഴ്ത്തി വെട്ടിക്കൊലപ്പെടുത്താന്‍ ശ്രമം.
രാവിലെ പത്തര മണിയോടെ തൊളിക്കോട് മലയടിയിലാണ് സംഭവം. ആക്രമണത്തില്‍ ഗുരുതരമായി പരുക്കേറ്റ തൊളിക്കോട് പുളിമൂട് സ്വദേശി അനസിനെ മെഡിക്കല്‍ കോളജില്‍ പ്രവേശിപ്പിച്ചു. രാവിലെ പുളിമൂട് നിന്നും പറണ്ടോട് ഭാഗത്തേക്ക് പോകുകയായിരുന്നു അനസ്.
ഇരുതലമൂലയില്‍ നിന്നും ആളൊഴിഞ്ഞ റോഡില്‍ കയറി സഞ്ചരിക്കവേ പിന്നാലെ ഒരു ഇന്നോവ കാര്‍ ഇയാളുടെ പിന്നാലെ ഉണ്ടായിരുന്നതായി ദൃക്‌സാക്ഷികള്‍ പറഞ്ഞു.
ഈ റോഡില്‍ മലയടി തടി മില്ലിന് സമീപം എത്തിയപ്പോള്‍ കാര്‍ ബൈക്കിനെ ഇടിച്ചു തെറിപ്പിക്കുകയും ബോംബ് എറിഞ്ഞ ശേഷം വെട്ടി പരുക്കേല്‍പ്പിക്കുകയും ചെയ്യുകയായിരുന്നതായി സ്ഥലവാസികള്‍ പറഞ്ഞു. ആക്രമണത്തില്‍ ഇരു കാലുകളും അറ്റു തൂങ്ങിയ നിലയിലായിരുന്നു. ഗുരുതരമായി പരുക്കേറ്റ ഇയാളെ നാട്ടുകാര്‍ മെഡിക്കല്‍ കോളജില്‍ എത്തിക്കുകയായിരുന്നു. വ്യാജ നമ്പര്‍ പതിച്ചു ഇന്നോവ കാറിലെത്തിയ സംഘം കൃത്യത്തിന് ശേഷം തൊളിക്കോട് ഭാഗത്തേക്ക് രക്ഷപെട്ടതായാണ് വിവരം. വ്യക്തി വൈരാഗ്യമാണ് ആക്രമണത്തിന് പിന്നിലെന്നറിയുന്നു. ആര്യനാട് പൊലിസ് സ്ഥലത്തെത്തി അന്വേഷണം ആരംഭിച്ചു.