റിയാദ്: രാജ്യത്ത് ബ്യുട്ടി പാർലറുകൾ സഊദിവൽക്കരിക്കുന്നതിന്റെ മുന്നോടിയായി ഈ മേഖലയിലേക്ക് സ്വദേശികളെ തയ്യാറാക്കാൻ അധികൃതർ തയ്യാറെടുപ്പുകൾ തുടങ്ങി. ഇതിനായി സഊദി യുവതികൾക്ക് പരിശീലനം നൽകുന്നതിന് അക്കാദമി തുടങ്ങാൻ നീക്കമുള്ളതായി ബന്ധപ്പെട്ടവർ വെളിപ്പെടുത്തിയതായി പ്രാദേശിക പത്രം റിപ്പോർട്ട് ചെയ്തു. വനിത ബ്യൂട്ടി പാർലറുകൾ നേരിടുന്ന തടസ്സങ്ങളെ കുറിച്ച് വിശകലനം ചെയ്യുന്നതിന് പാർലർ ഉടമകളായ വനിതാ വ്യവസായികൾ ജിദ്ദ മേയർ എൻജിനീയർ സ്വാലിഹ് അൽതുർക്കിയുമായി കഴിഞ്ഞ മാസം കൂടിക്കാഴ്ച നടത്തിയിരുന്നു. ഇതിനു പിന്നാലെയാണ് ബ്യൂട്ടി പാർലർ മേഖലയിൽ സഊദിവൽക്കരണം വേഗത്തിലാക്കുന്നതിന് അക്കാദമി തുടങ്ങാൻ ബന്ധപ്പെട്ടവർ നീക്കം തുടങ്ങിയത്.

 

        ബ്യൂട്ടി പാർലർ മേഖലയിലെ ഏതാനും തൊഴിലുകളിൽ നിയമിക്കുന്നതിന് യോഗ്യരായ സഊദി വനിതകളെ തീരെ കിട്ടാനില്ല. ഇത്തരം തൊഴിലുകളിൽ വിദഗ്ധർ പരിശീലനം നൽകുന്ന അക്കാദമിയുണ്ടെങ്കിൽ ഈ മേഖലയിൽ സഊദിവൽക്കരണം എളുപ്പമാകുമെന്നാണ് അധികൃതരുടെ കണക്കു കൂട്ടൽ. ജിദ്ദയിൽ പതിനയ്യായിരത്തോളം ലേഡീസ് ബ്യൂട്ടി പാർലറുകളുണ്ടെന്നാണ് കണക്ക്. ഈ മേഖലയിൽ സഊദി വൽക്കരണം കൊണ്ടുവന്നാൽ, വനിതകൾക്ക് നല്ലൊരു ശതമാനം ജോലിയും നൽകാനാവുമെന്നാണ് അധികൃതർ കരുതുന്നത്. ബ്യൂട്ടി പാർലർ മേഖലയിൽ വിജയകരമായി സഊദി വൽക്കരണം നടപ്പാക്കുന്നതിന് സഊദി യുവതികൾക്ക് ഈ മേഖലയിലെ തൊഴിലുകളിൽ മികച്ച നിലയിൽ പരിശീലനം നൽകുന്ന അക്കാദമി സ്ഥാപിക്കൽ പ്രധാനമാണെന്ന് ജിദ്ദ ചേംബർ ഓഫ് കൊമേഴ്‌സിലെ ബ്യൂട്ടി പാർലർ കമ്മിറ്റി വൈസ് പ്രസിഡന്റ് ഈമാൻ ആശൂർ പറഞ്ഞു.

 

        പതിനായിരം റിയാൽ വരെ വേതനം ലഭിക്കുന്ന മെയ്ക്കപ്പ് വിദഗ്ധരായ സ്വദേശി യുവതികൾ അല്പമെങ്കിലും ലഭ്യമാണെങ്കിലും  ഹെയർ സ്റ്റൈൽ, ഹെയർ ഡൈ, മസാജിംഗ്, മൊറോക്കൻ സ്പാ തുടങ്ങിയ മേഖലകളിൽ വിദഗ്ധരായ സഊദി വനിതകളെ കിട്ടാനില്ല. ഹെയർ സ്റ്റൈൽ, ഹെയർ ഡൈ വിദഗ്ധർക്ക് പന്ത്രണ്ടായിരം റിയാൽ വരെ വേതനം ലഭിക്കുന്നതായാണ് കണക്കുകൾ.