ന്യൂഡല്‍ഹി: സ്വകാര്യ ഭൂമി പൊതുനന്മക്കായി ഏറ്റെടുത്ത് പുനര്‍വിതരണം ചെയ്യാമെന്ന ഉത്തരവ് റദ്ദാക്കി സുപ്രിം കോടതി. ചീഫ് ജസ്റ്റിസ് ഡി.വൈ. ചന്ദ്രചൂഢ് അധ്യക്ഷനായ ഒമ്പതംഗ ഭരണഘടന ബെഞ്ചിന്റേതാണ് നിര്‍ണായക ഉത്തരവ്. സ്വകാര്യ സ്വത്തുക്കള്‍ പൊതുനന്മക്കായി ഏറെരെടുക്കാമെന്ന ജസ്റ്റിസ് വി.ആര്‍ കൃഷ്ണയ്യരുടെ വിധിയെ പുനര്‍ വ്യാഖ്യാനം ചെയ്താണ് പുതിയ വിധി പുറപ്പെടുവിച്ചിരിക്കുന്നത്. 

സ്വകാര്യ വ്യക്തികളുടെ ഭൂമി പൊതുസ്വത്താണെന്ന ഉത്തരവും കോടതി തിരുത്തി. എന്നാല്‍, സ്വകാര്യ ഭൂമികളില്‍ ചിലത് പൊതുസ്വത്താണെന്ന് വിലയിരുത്താമെന്നും കോടതി നിരീക്ഷിച്ചു. മാനദണ്ഡങ്ങള്‍ പാലിച്ച് മാത്രം വിഭവങ്ങള്‍ ഏറ്റെടുക്കാമെന്നും സുപ്രിംകോടതി വ്യക്തമാക്കി.

ഏഴുപേര്‍ അനുകൂല വിധി പുറപ്പെടുവിച്ചപ്പോള്‍ രണ്ടുപേര്‍ ഭിന്നവിധി എഴുതി. മുംബൈയിലെ പ്രോപ്പര്‍ട്ടി ഓണേഴ്‌സ് അസോസിയേഷന്‍ (പിഒഎ) അടക്കമുള്ളവര്‍ സമര്‍പ്പിച്ച 16 ഹരജികളിലാണ് സുപ്രിം കോടതി വിധി പ്രഖ്യാപിച്ചത്.  ഭരണഘടനയുടെ അനുച്ഛേദം 39(ബി), 31 സി എന്നിവ പ്രകാരം സ്വകാര്യ സ്വത്തുക്കള്‍ സര്‍ക്കാരിന് ഏറ്റെടുക്കാന്‍ കഴിയില്ലെന്നായിരുന്നു ഹരജിക്കാരുടെ വാദം.