ന്യൂഡല്‍ഹി: ലോറന്‍സ് ബിഷ്‌ണോയിയുടെ ചിത്രമുള്ള ടീഷര്‍ട്ടുകള്‍ വിറ്റതിന്റെ പേരില്‍ പുലിവാലു പിടിച്ചിരിക്കുകയാണ് പ്രമുഖ ഇ-കൊമേഴ്‌സ് സ്ഥാപനമായ മീഷോ. 168 രൂപ വിലയുള്ള ടീഷര്‍ട്ടിലെ ലോറന്‍സ് ബിഷ്‌ണോയിയുടെ ചിത്രത്തിനു താഴെ ഗ്യാങ്ങ്‌സ്റ്റര്‍ എന്നും എഴുതിയിട്ടുണ്ട്.

ലോറന്‍സ് ബിഷ്‌ണോയിയെപ്പോലെ ഒരു കുറ്റവാളിയെ ടീഷര്‍ട്ടില്‍ ചിത്രീകരിക്കുന്നതിലൂടെ കുറ്റകൃത്യങ്ങളെ വാഴ്ത്തുന്നതിനാണ് മീഷോ കൂട്ടുനില്‍ക്കുന്നതെന്ന് സാമൂഹ്യ മാധ്യമങ്ങളിലൂടെ ആളുകള്‍ വിമര്‍ശിക്കുന്നുണ്ട്. പഞ്ചാബി ഗായകനായ സിദ്ധു മൂസെവാലെ, മുന്‍ മന്ത്രിയും അജിത് പവാര്‍ പക്ഷം എൻ.സി.പി നേതാവുമായ ബാബ സിദ്ധീഖി എന്നിവരുടെ കൊലപാതകത്തില്‍ ആരോപണവിധേയനായ ലോറന്‍സ് ബിഷ്‌ണോയി ഗുജറാത്തിലെ സബര്‍മതി ജയിലിലാണ്.