വടകര: നഗരസഭാ വൈസ് ചെയര്‍ പേഴ്‌സണായി സി.പി.എമ്മിലെ കെ.പി ബിന്ദുവിനെയും ആരോഗ്യ സ്റ്റാന്‍ഡിങ് കമ്മറ്റി ചെയര്‍മാനായി സി.പി.ഐ യിലെ പി.അശോകനെയും തെരഞ്ഞെടുത്തു.
ഇടതു മുന്നണി ധാരണ പ്രകാരം സി.പി.ഐ ലെ പി.ഗീത വൈസ് ചെയര്‍ പേഴ്‌സണ്‍ സ്ഥാനവും സി.പി.എമ്മിലെ പി.ഗിരീശന്‍ ആരോഗ്യ സ്റ്റാന്‍ഡിങ് കമ്മറ്റി ചെയര്‍മാന്‍ സ്ഥാനവും രാജി വെച്ച ഒഴിവിലേക്കായിരുന്നു തെരഞ്ഞെടുപ്പ്. വൈസ് ചെയര്‍മാന്‍ തെരഞ്ഞെടുപ്പില്‍ കെ.പി.ബിന്ദുവിന് 28 വോട്ടും, എതിരേ മത്സരിച്ച യു.ഡി.എഫിലെ എ.പ്രേമകുമാരിക്ക് 16 വോട്ടും ലഭിച്ചു.
ലോക് താന്ത്രിക് ജനതാദളിലെ രണ്ട് അംഗങ്ങള്‍ തെരഞ്ഞെടുപ്പില്‍ ഭരണ പക്ഷ ബെഞ്ചിലിരുന്ന് എല്‍.ഡി.എഫ് സ്ഥാനാര്‍ഥിക്ക് വോട്ട് നല്‍കി. ബി.ജെ.പി യുടെ രണ്ട് അംഗങ്ങള്‍ വോട്ട് അസാധുവാക്കിയപ്പോള്‍ യു.ഡി.എഫ് അംഗമായ പി.ശോഭന അസുഖത്തെ തുടര്‍ന്ന് യോഗത്തില്‍ പങ്കെടുത്തില്ല. ആരോഗ്യ സ്റ്റാന്‍ഡിങ് കമ്മറ്റി ചെയര്‍മാന്‍ തെരഞ്ഞെടുപ്പില്‍ സി.പി.ഐ യിലെ പി.അശോകന്‍ എതിരില്ലാതെ തെരഞ്ഞെടുക്കപ്പെട്ടു. ജില്ലാ ഫോറസ്റ്റ് ഓഫീസര്‍ സത്യപ്രഭ വരണാധികാരിയായിരുന്നു. തുടര്‍ന്ന് നടന്ന അനുമോദന യോഗത്തില്‍ ഇ.അരവിന്ദാക്ഷന്‍, പി.ഗീത, വി. ഗോപാലന്‍, ടി. കേളു, എം.പി അഹമ്മദ്, കെ.കെ രാജീവന്‍ പ്രസംഗിച്ചു. യു.ഡി.എഫ് വോട്ട് വാങ്ങി വിജയിച്ച എല്‍.ജെ.ഡിയ അംഗങ്ങള്‍ എല്‍.ഡി.എഫ് സ്ഥാനാര്‍ത്ഥികള്‍ക്ക് വോട്ട് ചെയ്തത് രാഷ്ട്രീയ വഞ്ചനയാണെന്ന് യു.ഡി.എഫ് പാര്‍ട്ടി കൗണ്‍സില്‍ ലീഡര്‍ ടി. കേളു ആരോപിച്ചു.