നാദാപുരം: ജില്ലയിലെ ആദിവാസി കോളനികളുടെ വികസനത്തിനു വേണ്ടി അനുവദിക്കപ്പെട്ട ഫണ്ട് അട്ടിമറിച്ചതായി ആരോപണം. ജില്ലയിലെ ആറ് ആദിവാസി കോളനികളുടെ വികസനത്തിനായി 2015ല്‍ 10 കോടി രൂപ അനുവദിച്ചിരുന്നു. 2015ല്‍ തന്നെ പ്രവൃത്തി ആരംഭിച്ച് 2017ല്‍ പൂര്‍ത്തിയാക്കണമെന്നുള്ള നിബന്ധനയോടുകൂടി സര്‍ക്കാര്‍ ഏജന്‍സി എഫ്.ഐ.ടി കമ്പനിക്കാണു പദ്ധതിനിര്‍വഹണ ചുമതല ഏല്‍പ്പിച്ചിരുന്നത്. എന്നാല്‍ നാലുവര്‍ഷം കഴിഞ്ഞിട്ടും പദ്ധതി എങ്ങുമെത്തിയിട്ടില്ല.
കോടഞ്ചേരി പഞ്ചായത്തിലെ വട്ടച്ചിറ കോളനിയിലെ ജോലികള്‍ മാത്രമാണ് പൂര്‍ത്തിയായിട്ടുള്ളത്. പുതുപ്പാടിയിലെ കുറുമുരുകണ്ടി കോളനി, വാണിമേല്‍ പഞ്ചായത്തിലെ കുറ്റല്ലുര്‍, പന്നിയേരി, മാടാഞ്ചേരി, വായാട് കോളനി എന്നിവിടങ്ങളിലെ പ്രവൃത്തികളാണ് അലങ്കോലപ്പെട്ടു കിടക്കുന്നത്. പ്രവൃത്തികള്‍ എവിടെയുമെത്താതെ ഇഴഞ്ഞു നീങ്ങുന്നതിനിടയിലും കരാറുകാരനു അഞ്ചു കോടി രൂപയുടെ ബില്ല് പാസാക്കി കൊടുക്കുകയായിരുന്നു. ഇതിന് ഉദ്യോഗതലത്തില്‍ വന്‍ ലോബിയുടെ പിന്തുണയുമുണ്ട്.
കേന്ദ്ര, സംസ്ഥാന സര്‍ക്കാരുകള്‍ പാര്‍ശ്വവല്‍ക്കരിക്കപ്പെട്ട ആദിവാസികളുടെ വികസനത്തിനു വേണ്ടി അനുവദിക്കപ്പെടുന്ന ഫണ്ടുകള്‍ കൃത്യമായി അവര്‍ക്ക് ലഭിക്കുന്നില്ല എന്ന ആരോപണം നിലനില്‍ക്കുന്നതിനിടെയാണു ജില്ലയിലെ ആദിവാസി വികസന പദ്ധതിയില്‍ ഞെട്ടിപ്പിക്കുന്ന തിരിമറി നടക്കുന്നത്. കോളനികളിലെ അടിസ്ഥാനവികസനം, റോഡ് നിര്‍മാണം, വീടുകളുടെ പുനരുദ്ധാരണം, വൈദ്യുതീകരണം, കുടിവെള്ള വിതരണം തുടങ്ങിയവയ്ക്കാണു ഫണ്ട് അനുവദിച്ചിരുന്നത്.