ബെയ്‌റൂത്ത്: ലബനാനില്‍ വാര്‍ത്താവിനിമയത്തിന് ഉപയോഗിക്കുന്ന പേജറുകള്‍ പൊട്ടിത്തെറിച്ച് വിവിധയിടങ്ങളിലായി എട്ട് പേര്‍ മരിച്ചു. മൂവായിരത്തോളം പേര്‍ക്ക് പരിക്കേല്‍ക്കുകയും ചെയ്തു. ഡോക്ടര്‍മാരും സാധാരണക്കാരും, ഹിസ്ബുല്ല പോരാളികള്‍ക്കും പരിക്കേറ്റതായാണ് റിപ്പോര്‍ട്ട്. ഒരേസമയം ആയിരത്തോളം പേജറുകള്‍ പൊട്ടിത്തെറിച്ച സംഭവം വലിയ സുരക്ഷാ ഭീഷണിയായാണ് കാണുന്നതെന്ന് ഹിസ്ബുല്ല ഉദ്യോഗസ്ഥന്‍ പറഞ്ഞു.

സ്‌ഫോടനത്തില്‍ ലബനാനിലെ ഇറാന്‍ അംബാസഡര്‍ മൊജ്തബ അമാനിക്കും പരുക്കേറ്റതായി ഇറാന്‍ വാര്‍ത്താ ഏജന്‍സിയായ മെഹര്‍ റിപ്പോര്‍ട്ട് ചെയ്തു. കഴിഞ്ഞ മാസങ്ങളില്‍ ഹിസ്ബുല്ല എത്തിച്ച ഏറ്റവും പുതിയ മോഡല്‍ പേജറുകളാണ് പൊട്ടിത്തെറിച്ചത്. സ്‌ഫോടനത്തിന് പിന്നില്‍ ഇസ്രാഈല്‍ ആണെന്ന് ഹിസ്ബുല്ല ആരോപിച്ചു. സംഭവത്തോട് ഇസ്രാഈല്‍ പ്രതികരിച്ചിട്ടില്ല. 

ബെയ്‌റൂത്തിന്റെ കിഴക്കന്‍ മേഖലകള്‍, തെക്കന്‍ ലബനാന്‍ എന്നിവിടങ്ങളില്‍ പേജറുകള്‍ പൊട്ടിത്തെറിച്ച സംഭവം റിപ്പോര്‍ട്ട് ചെയ്യപ്പെട്ടു. കാലിനും മുഖത്തും കണ്ണിനും പരുക്കേറ്റ നിലയിലാണ് ആളുകളെ ആശുപത്രിയിലെത്തിക്കുന്നത്. തെക്കന്‍ ലബനാനിലെ നബാതിയ പബ്ലിക് ആശുപത്രിയിലാണ് നിരവധി പേരെ പ്രവേശിപ്പിച്ചത്.

വൈകിട്ട് 3.45 നാണ് പേജര്‍ പൊട്ടിത്തെറിച്ച സംഭവം ആദ്യമായി റിപ്പോര്‍ട്ട് ചെയ്തത്. പ്രാദേശിക ടെലിവിഷനുകള്‍ പുറത്തുവിട്ട സി.സി.ടി.വി ദൃശ്യങ്ങളില്‍ ആളുകളെ കൈയിലും പോക്കറ്റിലുമുള്ള പേജറുകള്‍ പൊട്ടിത്തെറിക്കുന്ന ദൃശ്യങ്ങളുണ്ട്.