മണ്ണാര്‍ക്കാട് : പ്രകൃതിയോട് ഒരുവിധത്തിലും ഇണങ്ങാത്തതും ഇഴുകി ചേരാത്തതുമായ പ്ലാസ്റ്റിക്കിനോട് 'നോ'പറയാന്‍ ഒരുങ്ങുകയാണ് മണ്ണാര്‍ക്കാട് റൂറല്‍ സര്‍വീസ് സഹകരണ ബാങ്ക്.' കുട്ടിസഞ്ചിനാട്ടുനന്മയുടെ ഊടും പാവും'എന്ന പ്രമേയവുമായാണ് ബാങ്ക് മുന്നോട്ട് വന്നിരിക്കുന്നത്. കുട്ടിസഞ്ചി ബോധവല്‍ക്കരണത്തോടൊപ്പം പ്രായോഗിക തലത്തിലും ഇടപെടാനാണ് ബാങ്കിന്റെ തീരുമാനം.
വാര്‍ഡ് അടിസ്ഥാനത്തില്‍ പ്രത്യേക ബോധവല്‍ക്കരണ പരിപാടിയിലൂടെ ഓരോ വീട്ടിലേക്കും ആവശ്യമായ കുട്ടിസഞ്ചികള്‍ സൗജന്യമായി എത്തിക്കും. ബാങ്ക് ഭരണസമിതി അംഗങ്ങളും ജീവനക്കാരുമാണ് പൊതുനന്മാ ഫണ്ടില്‍ നിന്ന് ആവശ്യമായ തുക ഉപയോഗിച്ചാണ് സൗജന്യ വിതരണം നടത്തുക. കുടുംബ ശ്രീ പ്രവര്‍ത്തകരുടെയും റസിഡന്‍ഷ്യല്‍ അസോസിയേഷനുകളുടെയും അധ്യാപകരുടെയും വിദ്യാര്‍ഥികളുടെയും ബാങ്ക് സമിതിയുടെയും നേതൃത്വത്തില്‍ പ്രത്യേകം സ്‌ക്വാഡുകള്‍ രൂപീകരിച്ചാണ് കുട്ടിസഞ്ചികള്‍ വിതരണം ചെയ്യുക.
വീടുകളില്‍ നിന്ന് പ്ലാസ്റ്റിക് ശേഖരിക്കുകയും ചെയ്യും. മൂന്ന് മാസം നീണ്ട് നില്‍ക്കുന്ന ഈ പദ്ധതിയില്‍ ഉള്‍പ്പെടുന്ന വാര്‍ഡില്‍ മുഴുവന്‍ വീടുകളിലും പൂര്‍ണമായി കുട്ടിസഞ്ചിയിലേക്ക് മടങ്ങിയെന്ന് ഉറപ്പ് വരുത്തിയതിന് ശേഷമെ അടുത്ത വാര്‍ഡിലേക്ക് പ്രവര്‍ത്തനം മാറ്റൂ.പൈലറ്റ് പ്രൊജക്റ്റായി മണ്ണാര്‍ക്കാട് നഗരസഭയിലെ 6,13 വാര്‍ഡുകളിലാണ് പ്രവര്‍ത്തനം ആരംഭിക്കുക.