ദമ്മാം: രാജ്യത്ത് കൂടുതല്‍ സ്വദേശികള്‍ക്ക് തൊഴില്‍ ലഭ്യമാക്കുന്നതിനു വേണ്ടി അടുത്ത ഘട്ടത്തില്‍ കൂടുതല്‍ മേഖലകളില്‍ സമ്പൂര്‍ണ സ്വദേശിവല്‍ക്കരണം ഏര്‍പ്പെടുത്തുന്നു.
റീെട്ടയില്‍ വില്‍പ്പന കേന്ദ്രങ്ങള്‍, റെന്റ് എ കാര്‍ സ്ഥാപനങ്ങള്‍, വാഹനങ്ങള്‍ വില്‍പ്പന നടത്തുന്ന സ്ഥാപനങ്ങള്‍, ജ്വല്ലറികള്‍, പച്ചക്കറി വില്‍പ്പന മേഖല എന്നിവയാണ് സ്വദേശിവല്‍ക്കരണം നടത്തുന്നതിനായി പുതുതായി നിശ്ചയിച്ച മേഖലകളെന്ന് തൊഴില്‍ മന്ത്രാലയ ഉദ്യോഗസ്ഥരെ ഉദ്ധരിച്ച് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ഇതോടെ വിദേശികള്‍ കയ്യടക്കി വച്ചിരുന്ന ഒട്ടുമിക്ക തൊഴില്‍മേഖലയും ഇനി നഷ്ടപെടും. ഇപ്പോള്‍ തന്നെ പച്ചക്കറി വില്‍പ്പന മേഖലയില്‍ സ്വദേശിവല്‍ക്കരണം നടപ്പാക്കി തുടങ്ങിയിട്ടുണ്ട്. വിദേശികളെ പല പച്ചക്കറി മാര്‍ക്കറ്റുകളില്‍ നിന്നും കഴിഞ്ഞ വര്‍ഷം മുതല്‍ തന്നെ ഒഴിവാക്കിയിരുന്നു. സ്വര്‍ണ കടകളിലും സ്വദേശിവല്‍ക്കരണം ശക്തമാണ്. എന്നാല്‍ ഈ മേഖലകളില്‍ നൂറു ശതമാനം സ്വദേശിവല്‍ക്കരണം കര്‍ശനമായി നടപ്പാക്കാനാണ് തീരുമാനം.
ചില്ലറ വില്‍പ്പന കേന്ദ്രങ്ങള്‍ സ്വദേശിവല്‍ക്കരിക്കുന്നതോടെ വിദേശികള്‍ക്ക് വന്‍ തോതില്‍ തൊഴില്‍ നഷ്ടത്തിനും ഇടയാക്കും. വിദേശികളില്‍ ഈ മേഖലയില്‍ നല്ലൊരു പങ്കും മലയാളികളാണ്. ഈ മേഖലകളില്‍ നൂറു ശതമാനം സ്വദേശിവല്‍ക്കരണം നടപ്പാക്കിയാല്‍ ഇവര്‍ക്കെല്ലാം നാട്ടിലേക്ക് മടങ്ങേണ്ടി വരും.