അബൂദബി: ഏഷ്യന്‍ കപ്പിന്റെ പ്രീക്വാര്‍ട്ടര്‍ മത്സരങ്ങള്‍ക്ക് ഇന്ന് തുടക്കമാകും. വൈകിട്ട് 4.30ന് തുടങ്ങുന്ന ആദ്യ മത്സരത്തില്‍ ജോര്‍ദാന്‍ വിയറ്റ്‌നാമിനെ നേരിടും.

ഗ്രൂപ്പ് ഘട്ടത്തില്‍ നിലവിലെ ചാംപ്യന്‍മാരായ ആസ്‌ത്രേലിയയെ ആദ്യ മത്സരത്തില്‍ തന്നെ ജോര്‍ദാന്‍ തകര്‍ത്തിരുന്നു. രണ്ടാം മത്സരത്തില്‍ രണ്ട് ഗോളിന് സിറിയയേയും തകര്‍ത്തിരുന്നു. മൂന്നാം മത്സരത്തില്‍ ഫലസ്തീനെ ഗോള്‍രഹിത സമനിലയില്‍ തളച്ച് ഗ്രൂപ്പ് ചാംപ്യന്‍മാരായിട്ടാണ് ജോര്‍ദാന്‍ പ്രീക്വാര്‍ട്ടറിലെത്തിയിട്ടുള്ളത്. ഗ്രൂപ്പ് ഡിയില്‍ നിന്ന് ഏറ്റവും മികച്ച മൂന്നാം സ്ഥാനക്കാരായിട്ടാണ് വിയറ്റ്‌നാം രണ്ടാം റൗണ്ടില്‍ പ്രവേശിച്ചിട്ടുള്ളത്. മൂന്ന് പോയിന്റ് മാത്രമുള്ള വിയറ്റ്‌നാം ഗ്രൂപ്പ് ഘട്ടത്തില്‍ യെമനെതിരേ മാത്രമേ വിജയം കണ്ടിട്ടുള്ളു.

മറ്റു രണ്ട് മത്സരങ്ങളിലും പരാജയമായിരുന്നു ഫലം. രാത്രി 7.30ന് നടക്കുന്ന മത്സരത്തില്‍ തായ്‌ലന്‍ഡും ചൈനയും തമ്മിലാണ് മത്സരം. എ ഗ്രൂപ്പില്‍ രണ്ടാം സ്ഥാനക്കാരായിട്ടാണ് തായ്‌ലന്‍ഡ് പ്രീക്വാര്‍ട്ടറിലെത്തിയിട്ടുള്ളത്. ഗ്രൂപ്പിലെ ആദ്യ മത്സരത്തില്‍ ഇന്ത്യക്കെതിരേ 4-1ന്റെ തോല്‍വിയും തായ്‌ലന്‍ഡ് വഴങ്ങിയിരുന്നു. ദക്ഷിണ കൊറിയ ഉള്‍പ്പെടുന്ന സിഗ്രൂപ്പില്‍ നിന്ന് ആറു പോയിന്റുമായി രണ്ടാം സ്ഥാനക്കാരായിട്ടാണ് ചൈന പ്രീക്വാര്‍ട്ടറിലെത്തിയിട്ടുള്ളത്. ചൈനക്ക് എതിരാളികള്‍ ചെറുതാണെങ്കിലും വിലകുറച്ച് കാണാനാവാത്ത ടീമാണ് തായ്‌ലന്‍ഡ്. രാത്രി 10.30ന് നടക്കുന്ന മത്സരത്തില്‍ ഇറാനും ഒമാനും തമ്മില്‍ കൊമ്പുകോര്‍ക്കും. ലോകകപ്പ് ടീമായ ഇറാന്‍ ഒമാനെ തകര്‍ക്കുമെന്ന ആത്മവിശ്വാസത്തിലാണ്. ഗ്രൂപ്പ് ഘട്ടത്തില്‍ രണ്ട് വിജയവും ഒരു സമനിലയുമാണ് ഇറാന്റെ സമ്പാദ്യം. ഒറ്റ വിജയം മാത്രമുള്ള ഒമാന്‍ എഫ് ഗ്രൂപ്പില്‍ നിന്ന് ഏറ്റവും മികച്ച മൂന്നാം സ്ഥാനക്കാരായിട്ടാണ് പ്രീക്വാര്‍ട്ടറിലെത്തിയിട്ടുള്ളത്. മത്സരങ്ങള്‍ നോക്കൗട്ട് റൗണ്ടിലേക്ക് കടന്നതിനാല്‍ ഇന്ന് മുതലുള്ള മത്സരങ്ങള്‍ തീപാറും.