ആലപ്പുഴ: താപനില കൂടിയതോടെ തീപിടിത്ത പരമ്പരകളുടെ  ദുരന്ത മുനമ്പിലായിട്ടും ജാഗ്രത പാലിക്കാതെ കേരളം. ചൂട് കനത്തതോടെ സംസ്ഥാനത്ത്  ചെറുതും വലുതുമായി നിരവധി തീപിടിത്തങ്ങളാണ് കഴിഞ്ഞ ദിവസങ്ങളിലുണ്ടായത്.

സുരക്ഷാ ചട്ടങ്ങള്‍ ലംഘിച്ചുള്ള കെട്ടിട നിര്‍മാണവും കെട്ടിട സമുച്ചയങ്ങളില്‍ മതിയായ സുരക്ഷാ മാനദണ്ഡങ്ങള്‍ പാലിക്കപ്പെടാത്തതും തീപിടിത്തത്തിനു കാരണമാകുന്നു. സുരക്ഷാ സംവിധാനങ്ങളുടെ കാര്യക്ഷമത സംബന്ധിച്ച് അധികൃതര്‍ നേരത്തെ സംസ്ഥാനത്ത് നടത്തിയ  പരിശോധനകളില്‍ പകുതിയിലേറെയും കെട്ടിടങ്ങള്‍ സുരക്ഷാ മാനദണ്ഡങ്ങള്‍ ലംഘിച്ചതായി കണ്ടെത്തിയിരുന്നു.

പെട്ടെന്നുള്ള അഗ്നിബാധ പ്രതിരോധിക്കാനുള്ള സംവിധാനമൊരുക്കുന്നതില്‍ സംസ്ഥാനത്തെ വന്‍കിട കെട്ടിടങ്ങളില്‍ ഭൂരിഭാഗവും വീഴ്ചവരുത്തുകയാണ്. 

ഒരു  ബഹുനില കെട്ടിടസമുച്ചയത്തിന് ഫയര്‍ഫോഴ്‌സ് അനുമതി നല്‍കണമെങ്കില്‍ ഫയര്‍ ഫൈറ്റിംഗ് സിസ്റ്റം, തീയണയ്ക്കാനുള്ള വെള്ളം സംഭരിക്കുന്നതിന് പ്രത്യേക വാട്ടര്‍ ടാങ്ക്, പുക പുറത്തേക്ക് തള്ളാനുള്ള സംവിധാനം, എല്ലാ നിലയിലും വെള്ളം എത്തിക്കുന്നതിനുള്ള പൈപ്പ് ലൈന്‍ സംവിധാനം, അലാറം, ലിഫ്റ്റിന് സുരക്ഷിത വാതില്‍, കെട്ടിടത്തിനുള്ളിലെ കോണികള്‍, പുറത്തേക്ക് പ്രത്യേകമായ കോണി തുടങ്ങിയ സംവിധാനങ്ങള്‍ ആവശ്യമാണ്.

കെട്ടിടങ്ങളുടെ അനുമതിക്കായി ആദ്യഘട്ടത്തില്‍ സ്ഥാപിക്കുമെങ്കിലും പിന്നീട് ഇവയെല്ലാം പ്രവര്‍ത്തന രഹിതമാകുന്നതാണ് പതിവ് കാഴ്ച. 

 പല കെട്ടിട സമുച്ചയങ്ങളിലും ഇത്തരം സംവിധാനങ്ങള്‍ കാര്യക്ഷമല്ലെന്ന് മാത്രമല്ല സ്ഥാപിച്ചിട്ടുള്ളവയില്‍ പ്രവര്‍ത്തിപ്പിക്കാന്‍  ജീവനക്കാരുമില്ല. ചില കെട്ടിടങ്ങളില്‍ താഴെ സുരക്ഷാ സൗകര്യങ്ങളൊരുക്കിയിട്ടുണ്ടെങ്കിലും മുകള്‍ നിലകളില്‍ ഇതില്ലാത്തതും വന്‍ തീപിടിത്തങ്ങളുണ്ടാവുമ്പോള്‍ പ്രതിസന്ധി സൃഷ്ടിക്കുന്നു. ഫയര്‍ഫോഴ്‌സ് റസ്‌ക്യൂ സംവിധാനം സംസ്ഥാനത്ത് ദുര്‍ബലമാണെന്നത് മറ്റൊരു പ്രതിസന്ധിയാണ്. 

ദേശീയ മാനദണ്ഡമനുസരിച്ച് താരതമ്യപ്പെടുത്തുമ്പോള്‍ സംസ്ഥാനത്ത് ഫയര്‍‌സ്റ്റേഷനുകളുടെ എണ്ണം നേര്‍പകുതി മാത്രമെന്നാണ് കണക്കുകള്‍ വ്യക്തമാക്കുന്നത്. ദുരന്തനിവരാണത്തിനുള്ള ദേശീയമാനദണ്ഡമനുസരിച്ച് സംസ്ഥാനത്ത് വേണ്ടത് 250ല്‍ ഏറെ ഫയര്‍‌സ്റ്റേഷനുകളാണ്.

എന്നാല്‍ 124 എണ്ണമാണ് കേരളത്തിലുള്ളത്. ഒറീസയിലെ ഫയര്‍ റസ്‌ക്യൂവിനെക്കാള്‍ പിന്നിലാണ് കേരളം.