കല്‍പ്പറ്റ: പ്രകൃതി വിഭവങ്ങളുടെ ഉപയോഗത്തിന് പരിധി നിശ്ചയിക്കണമെന്നും ഇക്കാര്യത്തില്‍ തദ്ദേശ സ്വയംഭരണ സ്ഥാപനങ്ങള്‍ ഉണര്‍ന്നു പ്രവര്‍ത്തിക്കണമെന്നും പശ്ചിമഘട്ട സംരക്ഷണ ഏകോപനസമിതി ഭാരവാഹികള്‍ വാര്‍ത്താസമ്മേളനത്തില്‍ ആവശ്യപ്പെട്ടു. അനിയന്ത്രിതമായ പ്രകൃതിവിഭവക്കൊള്ളയാണ് വയനാട് നേരിടുന്ന അതീവ ഗുരുതരമായ പ്രതികൂല കാലാവസ്ഥയ്ക്ക് കാരണം. ഭവന നിര്‍മാണം ഉള്‍പ്പടെയുള്ള കെട്ടിട നിര്‍മാണങ്ങള്‍ക്ക് വ്യക്തമായ നയമുണ്ടാകണം.
എങ്ങനെയും എവിടെയും കെട്ടിടം ഉണ്ടാക്കാമെന്ന ശൈലി മാറണം. തോടുകളും പുഴകളും തണ്ണീര്‍തടങ്ങളും സംരക്ഷിക്കാന്‍ തദ്ദേശ സ്ഥാപനങ്ങള്‍ തയാറാകണം.
ഈ ആവശ്യങ്ങള്‍ ഉയര്‍ത്തി സംഘടന പ്രക്ഷോഭത്തിലേക്ക് നീങ്ങുമെന്നും ഭാരവാഹികള്‍ പറഞ്ഞു. ജില്ലാ പ്രസിഡന്റ് വര്‍ഗീസ് വട്ടേക്കാട്ടില്‍, പി.ടി പ്രേമാനന്ദ്, ദേവസ്യ പള്ളിക്കുന്ന് എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.