ഫറോക്ക് : ബേപ്പൂര്‍ കയര്‍ ഫാക്ടറി നവീകരണം ഉടനെ ആരംഭിക്കുമെന്ന് കേരളാ കയര്‍ കോര്‍പറേഷന്‍ ചെയര്‍മാന്‍ ആര്‍. നാസര്‍ വ്യക്തമാക്കി. ഇതിന്റെ ഭാഗമായി പ്രതിദിനം 30,000 തൊണ്ടുകള്‍ സംസ്‌കരിക്കാന്‍ ശേഷിയുള്ള ഡി-ഫൈബറിങ് മില്‍ ഉടന്‍ ബേപ്പൂരിലെത്തിക്കും. അത്യാധുനിക സൗകര്യത്തോടുകൂടിയ പ്രത്യേക ഷോറൂമുകളും ഇവിടെ തുടങ്ങും.
    തൊണ്ട് സംസ്‌കരണത്തിനായി ആലുപ്പുഴയിലെ കമ്പനിയില്‍ തന്നെ വികസിപ്പിച്ചെടുത്ത യന്ത്രമാണ് ബേപ്പൂരിലേക്ക് ഡി-ഫൈബറിങ് മില്ലിനായി എത്തിക്കുന്നത്. സാധരണ 120 വോള്‍ട്ടിനു പകരം 70 വോള്‍ട്ടില്‍ പ്രവര്‍ത്തിപ്പിക്കാവുന്നതും അറ്റകുറ്റപണികള്‍ പ്രാദേശികമായി നടത്താവുന്നതുമാണ് ഈ യന്ത്രം. കെട്ടിട നിര്‍മാണം വേഗത്തില്‍ പൂര്‍ത്തിയാക്കി മില്‍ എത്രയും വേഗം പ്രവര്‍ത്തന സജ്ജമാക്കും. ബേപ്പൂരില്‍ ഉല്‍പാദിപ്പിക്കുന്ന ചകിരിനാര് കോര്‍പറേഷനു കീഴിലെ അടൂര്‍ ഫാക്ടറിയിലേക്ക് തന്നെ വാങ്ങും. പുതിയ മില്‍ തുടങ്ങുന്നതോടെ ഉല്‍പാദനം വന്‍തോതില്‍ വര്‍ധിക്കുന്നതിനൊപ്പം തൊഴില്‍ സാധ്യതയേറുമെന്നുമാണ് പ്രതീക്ഷിക്കുന്നത്.  ഇന്നലെ രാവിലെ ബേപ്പൂര്‍ കയര്‍ ഫാക്ടറിയിലെത്തിയ ചെയര്‍മാനെ ജീവനക്കാരും തൊഴിലാളികളും ചേര്‍ന്നു സ്വീകരിച്ചു. കയര്‍ കോര്‍പറേഷന്‍ പേഴ്‌സനല്‍ മാനേജര്‍ സുനില്‍ രാജ്, പ്രൊജക്ട് ഓഫിസര്‍മാരായ റോവി, കൃഷ്ണപ്രസാദ് എന്നിവരും ചെയര്‍മാനൊപ്പമുണ്ടായിരുന്നു.