അങ്ങാടിപ്പുറം: ചെറുകര പുളിങ്കാവ് മലറോഡ് കൊല്ലിയില്‍ കോളനി, ചെറുകര പാറക്കച്ചോല മേഖല തുടങ്ങിയ പ്രദേശങ്ങളില്‍ കുടിവെളളം മുടങ്ങിയിട്ട് ആഴ്ച്ചകളായി.നിരവധിതവണ സ്ത്രീകള്‍ ഉള്‍പ്പെടെയുള്ളവര്‍ വാട്ടര്‍ അതോറിറ്റി ഓഫിസില്‍ നേരിട്ടുപോയി പരാതി പറഞ്ഞിട്ടും അധികൃതര്‍ തിരിഞ്ഞു നോക്കിയിട്ടില്ല.
ഇതില്‍ തന്നെ മലറോഡ് കൊല്ലിയില്‍ കോളനി ഭാഗത്തു നാലു മാസത്തോളമായി കുടിവെളളം നിരന്തരം മുടങ്ങുന്നു. രണ്ടാഴ്ചയില്‍ ഒരിക്കല്‍ മാത്രമാണ് അല്‍പം വെള്ളം ലഭിക്കുന്നതെന്നും നാട്ടുകാര്‍ പറയുന്നു.
കിണര്‍ വെള്ളമോ, കുഴല്‍ക്കിണറോ ഇല്ലാത്ത ഈ പ്രദേശത്തുകാര്‍ക്കു വാട്ടര്‍ അതോറിറ്റി നല്‍കുന്ന വെള്ളമാണ് ഏകാശ്രയം. ഇപ്പോള്‍ ഇതുകൂടി മുടങ്ങിയത് നാട്ടുകാരെ തീരാദുരിതത്തിലാക്കി.