ക്വാലാലംപൂര്‍: കിം ജോങ് നാം വധക്കേസില്‍ മലേഷ്യന്‍ പൊലിസ് അറസ്റ്റ് ചെയ്ത ഉത്തര കൊറിയന്‍ പൗരനെ വിട്ടയക്കും. ഇയാളെ ഇന്ന് ഉത്തര കൊറിയയിലേക്ക് നാടുകടത്താനാണ് തീരുമാനമെന്ന് മലേഷ്യന്‍ അറ്റോര്‍ണി ജനറല്‍ മുഹമ്മദ് അപാന്ദി അലി പറഞ്ഞു.
കേസില്‍ പിടിയിലായ റി ജോങ് ചോളിനെയാണ് വിട്ടയക്കുക. ഇയാള്‍ക്കെതിരേ കുറ്റം ചുമത്താന്‍ ആവശ്യമായ തെളിവ് ഇല്ലെന്ന് അലി പറഞ്ഞു.
കേസില്‍ കൃത്യം നടത്തിയ രണ്ടു സ്ത്രീകള്‍ക്കെതിരേ കഴിഞ്ഞ ദിവസം കൊലക്കുറ്റം ചുമത്തിയിരുന്നു. ഉത്തര കൊറിയന്‍ ഭരണാധികാരി കിം ജോങ് ഉന്നിന്റെ അര്‍ധസഹോദരനാണ് കൊല്ലപ്പെട്ട കിം ജോങ് നാം. കഴിഞ്ഞ മാസം 13 നായിരുന്നു സംഭവം. വി.എക്‌സ് എന്ന രാസവസ്തുവാണ് കൊലക്ക് ഉപയോഗിച്ചത്.
കേസില്‍ ബന്ധമുണ്ടെന്ന് സംശയിക്കുന്ന നിരവധി പേരെ പൊലിസ് ചോദ്യം ചെയ്തിരുന്നു. കഴിഞ്ഞ മൂന്നു വര്‍ഷമായി മലേഷ്യയില്‍ താമസിക്കുന്നയാളാണ് റി ജോങ് ചോള്‍.
സംഭവം നടന്ന് നാലു ദിവസത്തിന് ശേഷമാണ് ഇയാളെ അറസ്റ്റ് ചെയ്തത്. ഇയാളെ കസ്റ്റഡിയിലെടുക്കാനുള്ള കാരണം പൊലിസ് വ്യക്തമാക്കിയിട്ടില്ല. ഇയാള്‍ക്ക് നിയമപ്രകാരമുള്ള യാത്രാരേഖയില്ലാത്തതിനാലാണ് നാടുകടത്തുന്നതെന്നാണ് വിശദീകരണം. ഫെബ്രുവരി ആറു വരെയായിരുന്നു ഇയാളുടെ വര്‍ക്ക് പെര്‍മിറ്റിന്റെ കാലാവധി.