പട്‌ന: നിതീഷ് കുമാറിനെതിരെ ആഞ്ഞടിച്ച് തെരഞ്ഞൈടുപ്പ് തന്ത്രജ്ഞന്‍ പ്രശാന്ത് കിഷോര്‍. തനിക്ക് നിതീഷ് കുമാറുമായി നല്ല ബന്ധമുണ്ടായിരുന്നവെന്ന് പറഞ്ഞാണ് അദ്ദേഹം വിമര്‍ശനങ്ങള്‍ തൊടുത്തു വിട്ടത്.

' എനിക്ക് നിതീഷ് ജിയുമായി നല്ല ബന്ധമായിരുന്നു. അദ്ദേഹത്തോട് അങ്ങേ അറ്റത്തെ ബഹുമാനമായിരുന്നു. അദ്ദേഹത്തിന്റെ തീരുമാനത്തെ ഞാന്‍ ചോദ്യം ചെയ്യില്ല'- പട്‌നയില്‍ ബാത് ബിഹാര്‍ കി എന്ന കാമ്പയിനില്‍ സംസാരിക്കുകയായിരുന്നു അദ്ദേഹം. അതേസമയം, ബി.ജെ.പിയുമായുള്ള സഖ്യം സംബന്ധിച്ച് തനിക്ക് നിതീഷ് കുമാറുമായി ആശയപരമായ വ്യത്യാസമുണ്ടെന്ന് പ്രശാന്ത് കിഷോര്‍ വ്യക്തമാക്കി.

ഗാന്ധിജിയുടെ ആദര്‍ശങ്ങളില്‍ വിശ്വസിക്കുന്നവര്‍ക്ക് ഗോഡ്‌സെയെ പിന്തുണക്കുന്നവര്‍ക്കൊപ്പം നില്‍ക്കാനാവില്ല. ഇതാണ് വ്യത്യാസമെന്നും അദ്ദേഹം കൂട്ടിച്ചേര്‍ത്തു. ഒരു പാദസേവകനെയല്ല, ശക്തനായ നേതാവിനെയാണ് ബിഹാറിന് ആവശ്യമെന്നും അദ്ദേഹം ചൂണ്ടിക്കാട്ടി. ബിഹാറിന്റെ വികസനവുമായി ബന്ധപ്പെട്ട തുറന്ന സംവാദത്തിന് അദ്ദേഹം നിതീഷ് കുമാറിനെ വെല്ലു വിളിച്ചു.